Өфөлә Көнсығыш сығыу юлын төҙөү өсөн уҙаҡташ һайланды

ӨФӨ, 2017 йыл, 17 февраль. /«Башинформ» мәғлүмәт агентлығы, Ольга Мортазина/. Башҡортостандың Транспорт һәм юл хужалығы буйынса дәүләт комитеты М7 һәм М5 федераль юлдарын тоташтырырға тейешле «Өфөнән Көнсығыш сығыу юлы» проекты буйынса концессия килешеүен төҙөргә ҡарар итте. Ведомствола хәбәр итеүҙәренсә, тәҡдим конкурстың икенсе этаптағы берҙән-бер ҡатнашыусыһы – «Башҡортостан концессия компанияһы» яуаплылығы сикләнгән йәмғиәтенә йүнәлтелә. Килешеүгә майҙа ҡул ҡуйыу күҙаллана.

Концессия килешеүе Галле урамы киҫелешенән Өфө йылғаһы ярына тиклем 1,2 саҡрым оҙонлоҡтағы ер аҫты туннелен, Өфө йылғаһы аша 2,6 саҡрымлыҡ күпер һәм 14 километр оҙонлоҡтағы автомобиль юлын һалыуға төҙөлә, тип иҫкә төшөрҙөләр комитетта. Сығымдарҙы ҡаплау өсөн яңы юл буйлап йөрөүҙе түләүле итеү күҙаллана. Киң мәғлүмәт саралары мәғлүмәттәре буйынса, проекттың хаҡы – 72 миллиард һумдан ашыу. Инвесторҙың 32 миллиард һум индереүе көтөлә.