2016 йылда төбәктә мәҙәниәткә 6 миллиард һумдан ашыу аҡса тотонолған

ӨФӨ, 2017 йыл, 17 февраль. /«Башинформ» мәғлүмәт агентлығы, Ләйлә Аралбаева/. Башҡортостанда 2016 йылда мәҙәниәт тармағында берләштерелгән бюджет сығымдары 6,324 миллиард һум тәшкил итте. Ошо хаҡта мәҙәниәт министры Әминә Шафиҡова Конгресс-холда уҙған ведомство коллегияһы ултырышында белдерҙе.

Волга буйы федераль округында республика халыҡ иҫәбенә бюджет сығымы буйынса етенсе урында (2015 йылда – алтынсы урын) тора.

Федераль ҡаҙнанан аҡса йәлеп итеү буйынса республикала ҙур эш башҡарыла, тип билдәләне министр. Дөйөм алғанда, дәүләт бюджетынан саралар күләме былтыр 120 миллион һум тәшкил итте. Уларҙан муниципаль берәмектәргә 64,4 миллион йүнәлтелде. Бынан тыш, өҫтәмә финанслау шарттарында Башҡортостан ҡаҙнаһынан муниципалитеттарға 26 миллион һум ебәрелде, шул уҡ ваҡытта урындағы бюджеттарҙан өҫтәмә финанслау күләме 30 миллион тәшкил итте.

Оҡшаш өҫтәмә финанслау практикаһынан иң сағыу миҫалдарҙың береһе – балалар сәнғәт мәктәптәрен музыка ҡоралдары менән тәьмин итеү эше. 14 муниципаль район һәм ҡаланың 20 мәктәбе өсөн дөйөм 17,5 миллион һумлыҡ 221 музыка ҡоралы һатып алынды. Программа эшләгән осорҙа (2013-2016 йылдарҙа) республиканың 53 муниципаль берәмеге 81 балалар сәнғәт мәктәбе өсөн 66,08 миллион һумлыҡ 428 музыка ҡоралы алды.