Финанс министрлығы бюджет ойошмаларында йүнәлешкә тура килмәгән хеҙмәттәрҙе аутсорсингка тапшыра

ӨФӨ, 2017 йыл, 13 февраль. /«Башинформ» мәғлүмәт агентлығы, Ольга Мортазина/. Башҡортостан Финанс министрлығы бюджет ойошмаларында йүнәлешкә тура килмәгән бөтә хеҙмәттәрҙе аутсорсингка тапшыра. Был — йыйыштырыу, транспорт менән хеҙмәтләндереү, төшкө аш әҙерләү һәм башҡа хеҙмәттәр. Ошо хаҡта РБК-Өфө хәбәр итә.

Үҙгәрештәр тәү сиратта мәктәптәргә, дауаханаларға, мәҙәниәт йорттарына ҡағыла. Башҡортостан Хөкүмәте һәм министрлыҡ вәкилдәре төркөмө ошо мәсьәләне хәл итеү өҫтөндә эшләй. Ярҙамсы функциялар коммерция һәм коммерцияға ҡарамаған ойошмаларға тапшырыла.

«Бюджет аҡсаһын экономиялау хаҡында һүҙ бармай», — тип республика финанс министры Рида Собханҡолованың һүҙҙәрен килтерә баҫма. — «Урыны менән һөҙөмтәлелектең юғары булмаясағын беләбеҙ, шуға күрә тәүге этаптарҙа субсидия бирергә лә әҙербеҙ. Әле хеҙмәт күрһәтеү сифатын яҡшыртыу, яңы шәхси предприятиелар асыу, ошо өлкәлә баҙар булдырыу хаҡында һөйләйбеҙ. Әгәр ҙә бөгөн ошо баҙарҙы булдырмаһаҡ, күршеләр киләсәк, улар тиҙерәк эшләй».

Хеҙмәтләндереүсе персонал штаттан сығарыла, ләкин «ҡыҫҡартыуҙар күҙ уңында тотолмай», билдәләне министр. Хеҙмәттәр элекке хеҙмәткәрҙәрҙең яңы структураға инеү шарты менән бизнесҡа тапшырыла. Баҫма мәғлүмәттәре буйынса, Өфөләге бер нисә мәктәп ағымдағы йылдың 1 июленән хеҙмәтләндереүсе персоналды сығарыу тураһында белдереү ҡағыҙы алған.

Өфөнөң бер нисә муниципалитеты бер нисә йыл башҡа ашханаларҙа бешерелгән иртәнге һәм төшкө аш килтерә. Ошо тәжрибәне бөтә республикала таратырға кәрәк. Финанс министрлығының яҡынса мәғлүмәттәре буйынса, 200-гә яҡын шәхси һәм муниципаль предприятие ҡатнашыуға ғариза биргән.

Транспорт хеҙмәттәренә килгәндә, балаларҙы мәктәпкә йөрөтөүҙе махсус транспорт компанияларына тапшырыу күҙаллана. Водителдәр аттестация һәм көн һайын медицина тикшереүе үтәсәк, автобустар ремонтланасаҡ. Мәктәп автобустары балаларҙы экскурсияларға һәм башҡа сараларға ла йөрөтөргә тейеш.

Мәктәп «транспорт» баҙарының күләме йылына яҡынса 600 миллион һум менән баһалана. Әлегә ошо аҡсаға «Башавтотранс» дәғүә итә. Финанс министрлығы иҫәпләүҙәре буйынса, урыны менән был тармаҡҡа ла субсидия бүлергә тура киләсәк.