Төбәктә сәй һәм күмәстәр арзанайған, һөт ҡиммәтләнгән

ӨФӨ, 2017 йыл, 8 февраль. /«Башинформ» мәғлүмәт агентлығы, Ольга Мортазина/. Башстат ғинуар айы өсөн республикала хаҡтарҙың тирбәлеү статистикаһын иғлан итте. Үткән айҙа сәй, шәкәр, көнбағыш майы, йомортҡа, тоҙ һәм ондан бешерелгән ашамлыҡтарға хаҡтың 1-2,6 процентҡа төшөүе теркәлгән. Сыр, аҡ май, эремсек, һөткә хаҡ 1,3-2,4 процентҡа артҡан. Ит ярымфабрикаттары, һыйыр ите, колбаса, тауыҡ бото 0,7-1,5 процентҡа ҡиммәтләнгән. Балыҡҡа хаҡ 0,7-1,9 процентҡа ҡыйбатланған.

Емеш-еләктән әфлисундар ғына арзанайған (10 процентҡа тиерлек). Бөтә йәшелсә, күберәк ҡыяр, помидор ҡиммәтләнгән (18-28 процентҡа).

Алыҫ араларға йөрөгән поездарға билет хаҡы уртаса 8,8 процентҡа, Өфөлә акция үткәреүгә бәйле ҡала электр транспортында 8 процентҡа төшкән. Еңел автомобиль йөрөтөү курсы уртаса 5 процентҡа осһоҙланған. Балалар баҡсаһына йөрөтөү хаҡы 7,6 процентҡа артҡан, нотариуста васыятнамә төҙөү 5,3 процентҡа ҡиммәтләнгән.

Ғинуарҙа миҙгелле кейем-һалымға һәм аяҡ кейеменә хаҡ бер аҙ төшкән (0,6-2,5 процентҡа) һәм бензинға, дизель яғыулығына (1,3-2,2), еңел автомобилдәргә (1-2) күтәрелгән. Шулай уҡ төҙөлөш материалдары (2 процентҡа) һәм көнкүреш химияһы (0,4-1,8) ҡиммәтләнгән.