Башстат 2016 йылда республика халҡының нисек үҙгәреүен иҫәпләп сығарҙы

ӨФӨ, 2017 йыл, 8 февраль. /«Башинформ» мәғлүмәт агентлығы, Ольга Мортазина/. Башстат 2016 йылдағы тәбиғи һәм миграция хәрәкәтенә йомғаҡ яһаны. Дөйөм алғанда, һөҙөмтә кире — дүрт мең самаһы кешегә кәмерәк. Былтыр 55 708 бала тыуған (2015 йыл менән сағыштырғанда 5,6 процентҡа аҙыраҡ). Бер йыл эсендә 52 283 кеше вафат булған (3,2 процентҡа йәки 1741 кешегә аҙыраҡ). Тыуыусылар һаны үлеүселәргә ҡарағанда 6,6 процентҡа күберәк (2015 йылда — 9,3-кә).

Үлемдең төп сәбәптәре араһында илдә әүәлгесә беренсе урынды ҡан әйләнеше системаһы ауырыуҙары биләй — 47,7 процент, Башҡортостан буйынса — 41,1. Яман һәм төрлө шештәрҙән үлеүселәр ҙә күп — 15,6 процент, республикала — 13,1. Тышҡы сәбәптәр арҡаһында вафат булғандар — 8,1 процент, Башҡортостанда — 9,8.

2016 йылдың ғинуар-декабрь айҙарында миграция ағымы күләме 301,8 мең осраҡ тәшкил иткән. Республиканан ситкә китеүселәрҙең һаны — 55 мең кеше. Килеүселәр — 47,6 мең. 100 меңдән ашыу кеше республика эсендә күсенгән. Уҙған йылдың ғинуар-декабрь йомғаҡтары буйынса халыҡтың дөйөм миграция кәмеүе 7390 кеше тәшкил иткән (2015 йылдың ошо уҡ осоронда — 5927 кеше).