1 февралдән социаль хеҙмәттәр йыйымының хаҡы артты — Башҡортостан буйынса Пенсия фонды

ӨФӨ, 2017 йыл, 1 февраль. /«Башинформ» мәғлүмәт агентлығы, Галина Бахшиева/. Айлыҡ аҡсалата түләү артыу менән социаль хеҙмәттәр йыйымын биреүгә йүнәлтелгән аҡса күләме лә үҫте. Бөгөндән ул 1048,97 һум тәшкил итә. Шул иҫәптән бушлай дарыу алыуға — 807,94, шифахана-курорт дауалауына — 124,99, ҡала яны тимер юл транспортында бушлай йөрөүгә, шулай уҡ ҡала-ара транспортында дауалана торған ергә барыу һәм ҡайтыуға — 116,04 һум.

Рәсәй Пенсия фондының идара ағзаһы, Башҡортостан буйынса идарасыһы Фоат Хантимеров хәбәр итеүенсә, 2017 йылдың 1 ғинуарына 100 253 кеше әйберләтә социаль хеҙмәттәр алған. Был — айлыҡ аҡсалата түләү билдәләнгән кешеләрҙең өстән бер өлөшө. Социаль хеҙмәттәр йыйымын алыуға хоҡуҡлы граждандарҙың 70 проценты социаль ярҙамды аҡсалата компенсация рәүешендә алырға теләк белдергән.

Тәүге тапҡыр айлыҡ аҡсалата түләү тәғәйенләнгән граждандарға быйыл социаль хеҙмәттәр йыйымы натураль формала бирелә. Теләге булғандар 1 октябргә тиклем киләһе йылдың 1 ғинуарынан әйберләтә хеҙмәттәр йыйылмаһынан баш тартыу тураһында ғариза яҙа ала.

Ғәмәлдәге ҡануниәткә ярашлы, йыл һайын ғариза яҙыу мотлаҡ түгел. Алдан ҡабул ителгән ҡарар үҙгәргән осраҡта ғына Пенсия фондына мөрәжәғәт итергә кәрәк.