Күмертауҙа «Боҙ аренаһы»н ағымдағы йылдың йәйенә сафҡа индереү билдәләнгән

ӨФӨ, 2017 йыл, 27 ғинуар. /«Башинформ» мәғлүмәт агентлығы, Ольга Мортазина/. Күмертауҙа «Боҙ аренаһы»н ағымдағы йылдың йәйенә сафҡа индереү билдәләнгән. Ошо хаҡта Башҡортостан Башлығы Хакимиәте етәксеһе Владимир Нагорныйҙың Күмертауға эш сәфәре барышында белдерелде. Уның менән бергә ҡалаға республиканың торлаҡ-коммуналь хужалыҡ министры Сергей Афонин килде. Күмертау ҡалаһы хакимиәтендә хәбәр итеүҙәренсә, бер нисә предприятие һәм социаль объект ҡаралды: йылылыҡ электр үҙәге (яңыраҡ «Свердловск энергия-газ компанияһы» уның милексеһе булып китте); «Күмертау авиация етештереү предприятиеһы» заводы; авария хәлендәге йорттарҙан күсерелгәндәр өсөн төҙөлгән яңы биҫтә; төҙөкләндереү эштәре барған Мәҙәниәт һарайы.

Тағы ла бер мөһим объект – «Боҙ аренаһы» һарайы, уны сафҡа индереү ағымдағы йылдың йәйенә билдәләнгән. Финанслау мәсьәләһе республика Башлығының контроленә алынған һәм яҡын арала хәл ителәсәк, тип билдәләнде.

Йылылыҡ электр үҙәгендә булғанда, Владимир Нагорный тарифтарҙы күтәреү темаһына ҡағылды. Свердловск энергия-газ компанияһы генераль директоры Алексей Ласковый әйтеүенсә, Күмертауҙа электр энергияһының хаҡы республикала иң түбәндәрҙең береһе ине, тарифтарҙы күтәреү иҡтисади яҡтан нигеҙләнгән. Свердловск энергия-газ компанияһы йылдам үҫеш биләмәһе резиденты булырға һәм ҡалала яңы етештереү объектын (уның өсөн 600-ләгән эш урыны талап ителәсәк) асырға ниәтләнеүен хәбәр итте ул.

Башҡортостан Башлығы Хакимиәте етәксеһе Күмертау авиация етештереү предприятиеһында булды һәм граждандарҙы ҡабул итте.