Республикала бәләкәй эшҡыуарлыҡты микрофинанслау күләме 350 миллион һум тәшкил итәсәк

ӨФӨ, 2017 йыл, 25 ғинуар. /«Башинформ» мәғлүмәт агентлығы, Ольга Мортазина/. Быйыл Башҡортостанда бәләкәй эшҡыуарлыҡҡа микрофинанс ярҙамының күләме 350 миллион һум тәшкил итәсәк. 2016 йылда был һан 302,5 миллион тәшкил иткәйне. Финанс ярҙамы 7 миллиард һумдан ашыу йыллыҡ килем күләмен тәьмин итте һәм ике мең эш урынын һаҡлап ҡалырға мөмкинлек бирҙе. Был хаҡта Башҡортостандың Эшҡыуарлыҡ һәм туризм буйынса дәүләт комитетында хәбәр иттеләр.

Бәләкәй эшҡыуарлыҡты микрофинанслау льготалы шарттарҙа 30 мең һумдан 300 меңгә тиклем займ биреүҙе күҙ уңында тота. Бәләкәй эшҡыуарлыҡҡа муниципаль кимәлдә микрофинанс ярҙамы күрһәтеү республика биләмәһендә, шул иҫәптән моноҡалаларҙа «Башҡортостан микрокредит компанияһы»ның 10 офисы эшмәкәрлеге иҫәбенә тормошҡа ашырылған.

2016 йылда тауар етештереүҙе үҫтереү буйынса муниципаль бизнес башланғыстарын ғәмәлгә ашырыу өсөн өс йылға тиклем 3 миллион һумғаса инвестиция займдарын биреү башланған. Йыл йомғаҡтары буйынса, был ауыл хужалығы (71 процент) һәм производство өлкәһендә (45 процент) бәләкәй бизнесты микрокредитлау күләмен арттырырға мөмкинлек бирҙе.