Былтыр төбәктә 16 социаль әһәмиәтле объект файҙаланыуға тапшырылған

ӨФӨ, 2017 йыл, 19 ғинуар. /«Башинформ» мәғлүмәт агентлығы, Ольга Мортазина/. Уҙған йылда Башҡортостанда дүрт юл, өс дауахана, дүрт балалар баҡсаһы һәм бассейнлы мәктәп төҙөлгән. Ошо объекттар араһында республика перинаталь үҙәге (Өфөнөң Аврора урамында), Шишмәлә балалар һәм өлкәндәр өсөн ике поликлиника, Стәрлетамаҡта йөҙөү бассейны менән мәктәп бар. Ағиҙелдә, Стәрлетамаҡта, Иҫке Балтаста, Мәләүез районының Тамъян ауылында балалар баҡсаһы асылған.

Өфөлә һәм республикала яңы юлдар: Интернациональ урамының дауамы (2 саҡрым), Затонды төньяҡтан урап үткән юлдың туғыҙ километрлыҡ һул һыҙаты, Ҡариҙел районында Кирзә-Әтнәшкә юл (17,5 саҡрым), Нуриман һәм Ҡариҙел райондарында Первомайск — Кирзә-Әтнәш участкаһы барлыҡҡа килде.

Биш тораҡ пунктта — Белоретта, район үҙәктәре Иҫке Собханғолда, Иҫке Балтаста, Федоровкала, Ҡалтасыла мәктәптәр яңыртылған. Был хаҡта Башҡортостандың Торлаҡ һәм төҙөлөш күҙәтеүе буйынса дәүләт комитетында хәбәр иттеләр.