Өфөнөң Нуғай ауылында мәктәп төҙөлөп бөтөп килә

ӨФӨ, 2017 йыл, 13 ғинуар./«Башинформ» мәғлүмәт агентлығы, Ольга Мортазина/. Өфөнөң Октябрь районы Нуғай ауылында 825 урынлыҡ мәктәп төҙөлөп бөтөп килә, тип хәбәр иттеләр муниципалитетта. Әлеге ваҡытта бында биҙәкләү эштәре алып барыла һәм инженер селтәрҙәре һуҙыла. Бина 2017 йылдың 1 сентябренә әҙер булырға тейеш. Бынан тыш, әүҙем төҙөлгән биҫтәлә балалар баҡсаһының икенсе корпусы һалынған, ул беренсе корпус йөгөн аҙайтырға һәм сиратты кәметергә мөмкинлек биргән.

«Нуғай халҡы өсөн яңы уҡыу йортоноң төҙөлөүе – күптән көтөп алған ваҡиға. Бында эшләп килгән берҙән-бер 147-се дөйөм белем биреү мәктәбе ҡырҡ йыл элек һалынған, әлеге ваҡытта унда 500-ҙән ашыу бала белем ала», — тип һөйләнеләр алыҫ биләмәләр менән эш итеү буйынса бүлектә.