2018 йылдан йорт хайуандарына һәм ауыл хужалығы малдарына келәймә һуғыу мәжбүри буласаҡ

ӨФӨ, 2017 йыл, 12 ғинуар. /«Башинформ» мәғлүмәт агентлығы, Ольга Мортазина/. 2018 йылдан йорт хайуандарына һәм ауыл хужалығы малдарына келәймә һуғыу мәжбүри буласаҡ, тип хәбәр итә «Известия» гәзите. Хөкүмәт Ауыл хужалығы, Иҡтисади үҫеш һәм Финанс министрлыҡтарына 15 февралгә тиклем идентификация системаһын индереүҙең «юл картаһын» әҙерләргә ҡушты. Ошо процесты ике этапта үткәреү ҡаралған. 2018 йылдың 1 ғинуарынан аттарға, ишәктәргә, ҡасырҙарға, эре мөгөҙлө малдарға, боландарға, дөйәләргә, сусҡаларға, 2019 йылдан иһә һарыҡтарға, кәзәләргә, эттәргә, бесәйҙәргә, йорт ҡоштарына, затлы тиреле йәнлектәргә, йорт ҡуяндарына, бал ҡорттарына, балыҡтарға келәймә һуғылырға тейеш.

Хайуандарға 15 һандан торған номер бирелә. Унда мал тураһында мәғлүмәт туплана. Тамға һуғыу саралары: чип, бирка, ҡарғы, татуировка, тамға, балдаҡ. Малға тыуғандан һуң тәүге өс ай эсендә йәки илгә индергәс тә келәймә һуғыу зарур. Закон ҡабул ителгәнгә тиклем тыуған хайуандарҙы системаға индереү кәрәкме, юҡмы икәнлеге аныҡланмай.