Республика 20 популяр туристик төбәк исемлегенә инде

ӨФӨ, 2016 йыл, 8 декабрь. /«Башинформ» мәғлүмәт агентлығы, Ольга Мортазина/. Башҡортостан илдең Рәсәй һәм сит ил туристары араһында популяр булған тәүге 20 төбәге иҫәбенә инде. «Рейтинг» мәғлүмәт коммуникациялары үҙәге «Рәсәйҙә ял итеү» журналы менән берлектә ил төбәктәренең туристар йәлеп итеү йәһәтенән тикшеренеү мәғлүмәттәрен баҫтырып сығарҙы. Тикшеренеү эштәре ҡунаҡханаларҙағы урындар һаны, туризм өлкәһендә мәшғүлдәр проценты, ошо өлкәлә эшләп алынған аҡса күләме, рәсәйҙәрҙең һәм сит ил туристарының ҡунаҡханаларҙа нисә көн йәшәүе, мәҙәни мираҫ объекттары реестрына индерелгән иҫтәлекле урындар һаны, тирә-яҡ мөхитте һаҡлауға тотонолған сығымдар, криминаль хәл, киң мәғлүмәт сараларында туристик ҡеүәтте яҡтыртыу кеүек критерийҙарға нигеҙләнгән.

Илдең 21 төбәге 60-тан ашыу балл йыйҙы. Башҡортостан исемлектә 12-се урында килә (64,4 балл). Иң юғары күрһәткестәр Мәскәү (80 балл), Санкт-Петербург ҡалаларында (79,7) һәм Краснодар крайында (77,3).