Төбәктә ит фестивале ҡунаҡтарын гастрономик шоу көтә

ӨФӨ, 2016 йыл, 2 декабрь. /«Башинформ» мәғлүмәт агентлығы, Галина Бахшиева/. 17 декабрҙә баш ҡалала II ит фестивале үткәрелә. Сараның маҡсаты — халыҡ традицияларын тергеҙеү, урындағы етештереүселәргә булышлыҡ күрһәтеү. Байрамдар алдынан унда яңы һуйылған ит һатып алырға мөмкин.

Гастрономик фестивалде ойоштороусылар — Өфө хакимиәте, Башҡортостандың Ауыл хужалығы министрлығы, Сауҙа-сәнәғәт палатаһы.

«ИтФест» Пархоменко урамы һәм Ибраһимов бульвары киҫелешендә урынлашҡан «Йәй» сауҙа үҙәге янында уҙа. Ойоштороусылар вәғәҙәләүенсә, бында парковка һәм саралар өсөн урын етерлек.

Республика Ауыл хужалығы министрлығының матбуғат хеҙмәтендә хәбәр итеүҙәренсә, «ИтФест» төрлө майҙансыҡта үтә. Йәрминкәлә яңы һуйылған ит тәҡдим ителә. Сарала республика ауыл хужалығы етештереүселәренең продукцияһын күмәртә хаҡ менән һатып алырға мөмкин. Башҡортостандың эшкәртеүсе предприятиелары колбаса, ит деликатестары һәм ярымфабрикаттар тәҡдим итә. Шулай уҡ һөт, икмәк, йомортҡа, сәй, кондитер изделиелары һатыла. Фестиваль программаһында ит турау буйынса оҫталыҡ дәрестәре ҡаралған.

Йылы бинала Өфө ашнаҡсылары милли һәм классик аш-һыу менән һыйлаясаҡ. Фестиваль ҡунаҡтарын Гастрономик шоу көтә.