Мәскәүҙә ENES форумында Өфөләге электр селтәрҙәре комплексын яңыртыу һөҙөмтәләре иғлан ителде

ӨФӨ, 2016 йыл, 24 ноябрь. /«Башинформ» мәғлүмәт агентлығы, Галина Бахшиева/. Башҡортостан вәкилдәре Мәскәүҙә ENES-2016 V Халыҡ-ара энергияны һаҡлау, уның һөҙөмтәлелеген арттырыу һәм энергетиканы үҫтереү форумы эшендә ҡатнаша.

Сараға 10 меңдән ашыу федераль һәм төбәк дәүләт власы органдары, милли һәм сит ил компаниялары, ғилми һәм эксперт берләшмәһе, йәштәр вәкилдәре килгән.

Төп темалар иҫәбендә иҡтисадтағы энергия һөҙөмтәлелеген арттырыу, ҡалаларҙы тотороҡло үҫтереү, бәләкәй ауылдарҙың инфраструктураһын инновациялы үҫтереү, энергетиканы үҫтереүҙең һәм ҡулланыусыларҙың энергияны һаҡлау ышаныслылығын арттырыуҙың бойондороҡһоҙ һәм фәнни нигеҙле сценарийҙарын булдырыу бар.

Өфө хакимиәте башлығы Ирек Ялалов Smart Grid технологияларын ҡулланып, баш ҡалалағы электр селтәрҙәрен реконструкциялау һәм тышҡы яҡтыртыу селтәрҙәрен яңыртыу буйынса доклад менән сығыш яһаны.

Ирек Ялалов әйтеүенсә, Өфө — илдә Smart Grid индереү буйынса эштәр алып барылған берҙән-бер ҡала.

«Аҡыллы селтәрҙәр»ҙең төп үҙенсәлеге — бер үк ваҡытта электр энергияһы юғалтыуҙары кәмегәндә электр менән тәьмин итеүҙең сифатын һәм ышаныслылығын арттырыуҙа.

«Smart Grid проектын тормошҡа ашырыу һөҙөмтәһендә беҙ коммерция һәм техник юғалтыуҙарҙың 80 һәм 10 процентҡа ҡыҫҡарыуын көтәбеҙ. Авариялар һанын кәметеү иҫәбенә ҡулланыусыларҙың көтөү ваҡытын 50 процентҡа ҡыҫҡартыу, төҙөкһөҙлөктөң булыу-булмауын асыҡлауға ваҡытты 70 процентҡа экономиялау, ҡорамалдарҙың хеҙмәт итеү ваҡытын 10 процентҡа оҙайтыу, — тип хәбәр итте форумда Өфө хакимиәте башлығы. — Өҫтәүенә селтәрҙәрҙе үҫтереү буйынса берҙәм система булдырыла. Шулай уҡ беҙ Өфө иҡтисадындағы энергия һөҙөмтәлелегенең һәм электр энергетикаһы секторында инвестициялар йәлеп итеү һәләтенең артыуын көтәбеҙ».