Республиканың Сауҙа-сәнәғәт палатаһы үтеп барған йылдың мөһим ваҡиғаларын барланы

ӨФӨ, 2015 йыл, 28 декабрь. /«Башинформ» мәғлүмәт агентлығы, Ольга Мортазина/. Өфөлә Яҙғы эшҡыуарлыҡ аҙналығы һәм Стәрлетамаҡта Эшҡыуарҙар көнө республикала бәләкәй эшҡыуарлыҡты үҫтереү өсөн ойошторолған сараларҙың иң мөһимдәре булды, тип иҫәпләйҙәр Башҡортостандың Сауҙа-сәнәғәт палатаһында. Ике майҙансыҡтың да эшендә дүрт меңдән ашыу эшҡыуар ҡатнашты. Улар өсөн «Стартап алышы», «галстукһыҙ» осрашыуҙар, семинарҙар кеүек ижади программалар әҙерләнде.

«Тағы ла бер мөһим башланғыс — «Бизнес-навигатор» проектының эшләй башлауы, уның сиктәрендә меңдән ашыу коммерсант ҡатнашлығында 18 сара ойошторолдо. Маркетинг һәм интернетта бизнесты үҫтереү популяр темалар булды. Был аҙ сығым талап иткән реклама эҙләү менән аңлатыла. Проекттың эксперттары — уңышлы эшҡыуарҙар һәм дәүләт ведомстволары етәкселәре. Тәүгеләре тәжрибәләре менән уртаҡлашты, икенселәре мөһим проблемаларҙы хәл итеү юлдарын өйрәтте», — тип иҫкә төшөрҙөләр Башҡортостандың Сауҙа-сәнәғәт палатаһында.