Өфөлә Ағиҙел ярының икенсе сиратын төҙөүгә ҡала бюджетынан 2,57 миллиард һум бүленәсәк

ӨФӨ, 2015 йыл, 27 август. /«Башинформ» мәғлүмәт агентлығы, Розалиә Вәлиева/. «Коммерсант» гәзитенең дәүләт һатып алыуҙары порталына һылтанып хәбәр итеүенсә, Ағиҙел йылғаһының ярын төҙөүҙе дауам итеү Өфө ҡалаһы бюджетынан финансланасаҡ.

21 сентябрҙә үтәсәк аукционда Өфөнөң Төҙөлөш, юлдарҙы һәм яһалма ҡоролмаларҙы йүнәтеү идаралығы төҙөлөштөң икенсе сиратының генераль подрядсыһын һайлап алырға планлаштыра. Уның менән башланғыс хаҡы 2,57 миллиард һум тәшкил иткән килешеү төҙөләсәк. Килешеү шарттары буйынса подрядсы тимер юл күперенән алып Бельский урамына тиклем 2 саҡрым яр буйын нығытыу һыҙатын төҙөкләндерергә тейеш. Ҡатнашыу өсөн ғаризалар 26 августан 21 сентябргә тиклем ҡабул ителә. Эштәрҙе 2017 йылға ҡәҙәр башҡарып сығыу күҙаллана.