Ғинуар-мартта республикала сәнәғәт етештереүендә өс процентлыҡ үҫеш күҙәтелә

ӨФӨ, 2015 йыл, 13 апрель. /«Башинформ» мәғлүмәт агентлығы, Эльвира Латипова/. Беренсе квартал йомғаҡтары буйынса, Башҡортостанда сәнәғәт етештереүе — өс процентҡа, мартта февралгә ҡарата 0,1 процентҡа артҡан. Был хаҡта Башҡортостанстат мәғлүмәттәренә һылтанып республиканың Иҡтисади үҫеш министрлығы хәбәр итә.

Транспорт саралары һәм ҡорамалдар (2013 йылдың ғинуар-март айҙарындағы кимәл менән сағыштырғанда 47,8 процентҡа), резина һәм пластмасса әйберҙәр етештереүҙә (17,3), металлургияла һәм әҙер металл әйберҙәр сығарыу буйынса предприятиеларҙа (13,2), электр ҡорамалдары, электрон һәм оптик ҡорамалдар етештереүҙә (8), химия производствоһында (6,7) һәм яғыулыҡ-энергетика файҙалы ҡаҙылмалар сығарыуҙа (5) һиҙелерлек үҫеш билдәләнгән.