Республикала күп фатирлы йорттарҙы ремонтлауҙа етешһеҙлектәр асыҡланған

ӨФӨ, 2015 йыл, 22 ғинуар. /«Башинформ» мәғлүмәт агентлығы, Артур Басиров/. Башҡортостанда 274 күп фатирлы йорттар буйынса капиталь ремонт ойоштороуҙа етешһеҙлектәр асыҡланған. Был республиканың Торлаҡ күҙәтеүе буйынса дәүләт комитеты уҙғарған профилле программаны ғәмәлгә ашырыу барышын тикшереү һөҙөмтәһендә асыҡланған. Ошо хаҡта дәүләт комитеты етәксеһе Илдар Замалетдинов «Башинформ» агентлығының конференциялар залында журналистар менән осрашыуҙа белдерҙе.

Былтыр ведомство ремонтланған 540 йорттоң 447-дә ревизия уҙғарған.

— Ҡайһылыр урында проект-смета документацияһы раҫланмаған йәки кәмселектәр исемлеге юҡ. Подряд ойошмаларын конкурс буйынса һайлап алыу тәртибен боҙоуҙар булған, — тип һөйләне Илдар Замалетдинов.

Дәүләт комитеты етәксеһе был техник күҙәтеү хеҙмәте, Төбәк операторы һәм урындағы үҙидараның эшләп еткермәүенә бәйле тип иҫәпләй.

Бөтә хоҡуҡ боҙоуҙар буйынса бойороҡтар сығарылған.