«Башҡортостан продукты» республика проектына тағы ла ун бер етештереүсе ҡушылды

ӨФӨ, 2014 йыл, 19 декабрь. /«Башинформ» мәғлүмәт агентлығы, Артур Басиров/. Тағы 11 етештереүсе «Башҡортостан продукты» республика бренды аҫтында үҙ продукцияһын һатыу мөмкинлегенә эйә булды. Шулай итеп, әле проекттың 169 дипломанты бар.

«Башҡортостан продукты» проекты урында сифатлы продукция етештереүселәргә булышлыҡ итеү өсөн булдырылған. Унда ҡатнашыу өсөн заявка бирергә һәм тауарҙың этикеткала күрһәтелгән сифатҡа ярашлы икәнен иҫбатлау өсөн продукцияны лабораторияла тикшертергә кәрәк. Урындағы баҙарҙа һәм унан ситтә төбәк продуктын алға ебәреү өсөн сауҙа-һатып алыу конференциялары уҙғарыла, республика һәм бөтә Рәсәй күләмендә проектта ҡатнашыусыларҙың коллектив экспозициялары ойошторола.