«ПОЛИЭФ» хеҙмәткәрҙәрен страховкалауға килешеү төҙөнө

Апрелдән «ПОЛИЭФ» предприятиеһы хеҙмәткәрҙәре ирекле медицина страховкалауы сиктәрендә медицина хеҙмәттәренән файҙалана аласаҡ.

— Социаль гарантиялар «ПОЛИЭФ» өсөн өҫтөнлөклө булып ҡала, — тип һыҙыҡ өҫтөнә алды персонал менән эшләү идаралығы начальнигы Ирина Шаркевич. — Предприятие хеҙмәткәрҙәрен ирекле медицина страховкалауы программаһы —бихисап пункттарҙың береһе. Полис «ПОЛИЭФ» хеҙмәткәрҙәренә, ә улар 1200-ләп кеше, мотлаҡ медицина страховкалауы сиктәрендә күрһәтелгәндәренән тыш өҫтәмә хеҙмәттәрҙән файҙаланыу мөмкинлеге бирә. Һәм был хеҙмәттәр предприятие иҫәбенә күрһәтеләсәк, эшселәр кеҫәһендә сағылмаясаҡ.

Страховка полисы консультатив ярҙам, диагностик тикшеренеү һәм амбулатор дауалау манипуляцияларын да индереп, медицина учреждениеларында өҫтәмә хеҙмәттәр алыуҙы тәьмин итә. Полис кисекмәҫтән госпитализация талап ителгәндә лә ҡулланыла ала.