Өфөлә тәүге көҙгө ауыл хужалығы йәрминкәләре 17 сентябрҙә старт ала

— Өфөлә йолаға әүерелгән көҙгө ауыл хужалығы йәрминкәләре 17 сентябрҙә башланасаҡ. Ә унан алда 10 сентябрҙә Һөт фестивале һәм бал йәрминкәһе үтәсәк. Продукттар менән һатыу итеү ҡала халҡы өйрәнгән урындарҙа ойоштороласаҡ, әлегә майҙансыҡтар исемлегенә асыҡлыҡ индерелә, - тине Өфө хакимиәте башлығы урынбаҫары Марат Ғәлиуллин «Үҙебеҙҙекен һайла – үҙебеҙҙекен һатып ал!» акцияһы башланыуына бағышланған «Башинформ» агентлығында үткән бөгөнгө матбуғат конференцияһында.

Уның фекеренсә, ауыл хужалығы йәрминкәләрен үткәреү – урындағы етештереүселәрҙең продукттарын һатыуҙың бер яҡшы формаһы. Ә халыҡҡа был сара ҡулайлы хаҡтар менән продукттар һатып алыу мөмкинлеген бирә.

— Алдағы йылдарҙағы кеүек үк йәрминкәләр яңы йыл байрамдарына тиклем дауам итәсәк. Ләкин барыһы ла һауа торошона бәйле, - тип асыҡлыҡ индерҙе Марат Ғәлуллин. – Быйыл беҙ айырыуса иғтибарҙы һатыу итеү шарттарына йүнәлтәсәкбеҙ. Продукттарҙың ерҙә ятыуы дөрөҫ түгел. Шуға күрә беҙ ауылдарҙан килгән һатыусылар үҙҙәренең продукттарын һала алырлыҡ махсус өҫтәлдәр әҙерләйәсәкбеҙ.