Банкирҙар һәм сәнәғәтселәр Өфөлә иҡтисадты модернизациялау юлдарын тикшерәсәк

Өфөлә 19 апрелдә «Төбәк иҡтисадын модернизациялауҙа финанс институттарының роле» конференцияһы үтәсәк. Бизнес һәм кредит ойошмалары вәкилдәре предприятиеларға экологик, энергияны һаҡсыл файҙаланыусы яңы технологияларҙы индереү алымдарын һәм перспективаларын тикшерәсәк, төбәк сәнәғәт компанияларының алдынғы Рәсәй банктары менән хеҙмәттәшлек итеү тәжрибәһе менән уртаҡлашасаҡ. Бынан тыш, бәләкәй һәм урта эшҡыуарлыҡҡа ярҙам күрһәтеү буйынса федераль һәм халыҡ-ара программалар һәм бындай программаларҙың Рәсәй Федерацияһының башҡа төбәктәрендә нисек тормошҡа ашырылыуы күрһәтеләсәк.

Конференцияны «ОПОРА России» дөйөм Рәсәй бәләкәй һәм урта эшҡыуарлыҡ йәмәғәт ойошмаһы, Башҡортостан Республикаһының Сауҙа-сәнәғәт палатаһы, шулай уҡ Рәсәйҙең һәм сит илдәрҙең бер нисә кредит ойошмаһы үткәрә.