Йыл башынан алып Башҡортостанда 15,5 мең фатир төҙөлгән

Ағымдағы йылдың туғыҙ айында Башҡортостанда дөйөм майҙаны 1406,3 мең квадрат метрлыҡ 15,5 мең фатир файҙаланыуға тапшырылған. Уҙған йылдың ошо уҡ осорона ҡарата был 86,6 процент. Республиканың мең кешеһенә иҫәптә 346 квадрат метр торлаҡ майҙаны сафҡа индерелгән.

Шәхси торлаҡ йорттар өлөшө дөйөм сафҡа индерелгән торлаҡтың 76,9 процентын тәшкил иткән. Шәхси төҙөүселәр менән дөйөм майҙаны 1081,8 мең квадрат метрлыҡ 10 меңдән ашыу шәхси йорт төҙөлгән (2009 йылдың ғинуар-октябренә ҡарата 83,6%).

Бащҡортостан Республикаһының Төҙөлөш һәм архитектура буйынса дәүләт комитетының матбуғат хеҙмәтенән хәбәр итеүҙәренсә, республика предприятиелары һәм ойошмалары менән үткән туғыҙ айҙа 324,5 мең квадрат метр торлаҡ файҙаланыуға тапшырылған — уҙған йылдың ошо уҡ осорона ҡарата 98,3%. Быйылғы йылдың ғинуар-октябрендә төҙөлөш эштәре күләме 62596,1 миллион һум тип баһалана йәки 2009 йылдың ошондай уҡ осорона ҡарата 93,9%.

Дөйөм алғанда Рәсәй буйынса торлаҡ төҙөлөшө күләме йыл башынан алып 37,7 миллион квадрат метр тәшкил иткән.