Өфөнөң ваҡлап һатыу өлкәһендә үҫеш күҙәтелә

Өфө ҡалаһының берәмләп сауҙа итеү өлкәһендә ыңғай үҙгәрештәр күҙәтелә. Был турала бөгөн оператив кәңәшмәлә республика баш ҡалаһы хакимиәте башлығы Павел Качкаев хәбәр итте. Уның әйтеүенсә, ағымдағы йылдың тәүге алты айында уҙған йылдың ошо уҡ осорондағы хаҡтар менән сағыштырғанда үҫеш 105 процент тәшкил иткән.

— Хәлдәрҙең яҡшырыуы күҙәтелмәгән берҙән-бер йүнәлеш был өлкәлә - ул йәмәғәт туҡланыуы, - тине ҡала башлығы. – Йәмәғәт туҡланыуы әйләнеше уҙған йылдың ошо уҡ осорондағы хаҡтар менән сағыштырғанда ни бары 96 процент тәшкил иткән. Был халыҡтың һаман да иҡтисади көрсөк эҙемтәләрен кисереүе менән аңлатыла. Йәмәғәт туҡланыу предприятиеларына барыу кешенең төп ихтыяждары иҫәбендә иң һуңғы позицияларҙың береһендә тора бит. Кафе йәки ресторанға халыҡ башҡаһы менән етәрлек тәьмин ителгән осраҡта ғына юллана.