Экологик именлек проблемалары тикшерелде

Мәләүездә Мәскәү дәүләт технология һәм идара итеү университеты филиалы базаһында "Мәғариф, фән, производствоның берләшеү процесында инновациялар" ғилми конференцияһы үтте. Пленар ултырышта һәм секциялар эшендә БР Мәғариф министрлығы, БР Фәндәр академияһы, сәнәғәт предприятиелары һәм агросәнәғәт комплексы вәкилдәре ҡатнашты. БР Экология министрлығының матбуғат секретары Гөлназ Әлмөхәмәтова хәбәр итеүенсә, конференция барышында тикшерелгән төп темаларҙың береһе булып тәбиғәттән файҙаланыу, экологик именлек һәм тирә-яҡ мөхитте һаҡлау проблемалары торҙо. Был мәсьәлә буйынса университет, Мәләүез район хакимиәтенең мәғариф бүлеге, ҡала предприятиелары һәм район мәктәптәре вәкилдәре менән "түңәрәк өҫтәл" үткәрелде. Республиканың көньяҡ зонаһындағы тәбиғәтте һаҡлау, уҡыусыларҙың һәм студенттарҙың экологик белем кимәлен күтәреү проблемаларын бергәләп хәл итеү маҡсатында БР Экология министрлығының Мәләүез территориаль комитеты менән район белем биреү учреждениеларының хеҙмәттәшлеген ойоштороу тураһында килешеүгә өлгәшелде.