Екатеринбургта Рәсәй-Италия иҡтисади форумы үтәсәк

8 апрелдә Екатеринбургта Рәсәй-Италия иҡтисади форумы үтәсәк. Унда федераль дәүләт власы органдары етәкселәре, шул иҫәптән Рәсәй Федерацияһы сәнәғәт һәм сауҙа министры Виктор Христенко ҡатнашасаҡ. Форумда ҡатнашыуға БР Сауҙа-сәнәғәт палатаһының эшҡыуарлыҡ буйынса комитеты рәйесе Руслан Кинйәкәев етәкселегендә Башҡортостандың эшлекле даирәләр делегацияһы юллана. Программала түңәрәк өҫтәлдәр һәм машиналар эшләү, металлургия, юғары технологиялар, мебель сәнәғәте, төҙөлөш һәм төҙөлөш индустрияһы кеүек сәнәғәт секторҙары буйынса бизнес-осрашыуҙар үткәреү ҡаралған. Һөйләшеүҙә финанс учреждениелары вәкилдәре лә ҡатнашасаҡ. Был сарала ҡатнашыу Италия предприятиеларының эш тәжрибәһе менән танышыу, фәнни-техник һәм технологик хеҙмәттәшлек перспективаларын тикшереү, Урал биләмәһендә берлектәге предприятиелар төҙөү мәсьәләһен ҡарау мөмкинлеге бирә. Руслан Кинйәкәев форумда доклад менән сығыш яһаясаҡ, бында ул итальян коллегалары ҡатнашлығында сәнәғәт кластерҙары төҙөү концепцияһын тәҡдим итәсәк, Итялияла уҡытыу һәм бизнес-туризм ойоштороу мөмкинлектәре тураһында һөйләйәсәк. Башҡортостан делегацияһы етәксеһе итальян телендә сығыш яһарға йыйына.