Тимер юлсылар ике айҙа 2,5 миллион тонна нефть ташыны

Республиканың транспорт системаһында йөк әйләнешенең яртыһы тиерлек Куйбышев тимер юлының Башҡортостан бүлексәһенә тура килә. Быйыл ғинуар-февраль айында Куйбышев магистраленең Башҡортостан бүлексәһе яуаплылығы зонаһындағы станцияларҙан 3,8 миллион тоннанан ашыу йөк оҙатылды, был пландағынан 3 процентҡа күберәк. Башҡортостан бүлексәһендә тейәлгән йөктәрҙең төп өлөшөн республиканың яғыулыҡ-энергетика, химия һәм нефть-химия комплекстары продукцияһы тәшкил итә. Куйбышев тимер юлының Башҡортостан бүлексәһе матбуғат секретары Сергей Спатар хәбәр итеүенсә, ике айҙа 2,5 миллион тоннанан ашыу нефть һәм уны эшкәртеү продукттары ташылды, был бүлексәлә тейәп оҙатылған йөк күләменең 60 процентын тәшкил итә. Ташылған йөктәр номенклатураһында икенсе урында - химикаттар һәм сода, улар 370 мең тонна тейәлде, өсөнсө урында - төҙөлөш материалдары. Тәғәйенләнеше буйынса был продукция 300 мең тоннанан ашыу оҙатылды. Куйбышев магистраленең Башҡортостан бүлексәһе яуаплылығы зонаһындағы станцияларҙа тәүлегенә 66 мең тонна йөк тейәп оҙатыла. Хәҙерге ваҡытта 5000-ләп клиент йөк оҙатыусылар булып тора, улар иҫәбендә Башҡортостандың сәнәғәт гиганттары һәм ҙур акционерҙар йәмғиәттәре генә түгел, шулай уҡ төрлө милекселек формаһындағы бәләкәй предприятиелар ҙа бар.