Уҡытыусы – ғорур яңғырай: Башҡортостанда педагогтарҙың август кәңәшмәһе йомғаҡтары

Эш башланыр алдынан республика етәксеһе ҡала мәҙәниәт һарайы фойеһында тармаҡ күргәҙмәһен ҡараны, Башҡортостандың «Алға» картаһы экосистемаһы нигеҙендә әҙерләнгән уҡытыусы картаһы менән танышты. Уның ярҙамында уҡытыусылар мәктәптәрҙә туҡланыу өсөн түләй, музейҙарға, мәҙәниәт һәм спорт учреждениеларына йөрөй, партнёрҙарҙың тауарҙарға һәм хеҙмәттәргә ташламалары менән файҙалана, профессиональ семинарҙарҙа һәм курстарҙа ҡатнаша ала. Бынан тыш, карта мәктәптәргә һанлы пропуск булып хеҙмәт итәсәк. Республика Башлығы идеяны хупланы һәм Башҡортостанда индерелгән уҡыусы картаһының уңайлы инструмент булып тороуын билдәләп үтте. Ул ата-әсәләргә баланың мәктәпкә килгән һәм ҡайтҡан ваҡытын күҙәтеп барырға, шулай уҡ мәктәп уҡыусыларына туҡланыу һәм юл хаҡын түләргә мөмкинлек бирә.

Башҡортостан Башлығы республиканың белем биреү учреждениеларында ҡулланылған цифрлы технологиялар менән танышты. Улар иҫәбендә – яһалма зиһен нигеҙендә булдырылған «АРТА» мәктәптәрҙе һаҡлауҙың интеллектуаль системаһы. Ул потенциаль хәүефле хәл-ваҡиғаларҙы асыҡлай ала. Мониторинг үҙәгендәге операторҙар был сигналдарҙы тикшерәсәк һәм экстрен хеҙмәттәрҙе саҡырыу тураһында оператив ҡарарҙар ҡабул итәсәк. Программаны әҙерләүселәр системаны Салауаттың белем биреү учреждениеларында һынап ҡарағандарын билдәләне. 2026 йылдың башында мәктәптәрҙә хәүефһеҙлекте һәм профилактика эшен көсәйтеү буйынса ҡарар ҡабул ителде, тине Радий Хәбиров.

Радий Хәбиров шулай уҡ республика психологик-педагогик, медицина һәм социаль ярҙам үҙәге ҡарамағындағы мәктәп психологтарына ярҙам итеү өсөн кризисҡа ҡаршы бүлексә хеҙмәткәрҙәре менән аралашты. Хәтерегеҙгә төшөрәбеҙ, ул 2026 йылдың мартында республика Башлығы указына ярашлы булдырылды. Белгестәрҙең бурысы – мәктәптәргә сығып ярҙам күрһәтеү, уҡыу йорттарында психологик мөхитте анализлау.

«Һеҙ мөһим эш башҡараһығыҙ. Ауыр эҙемтәләргә килтереүе ихтимал булған хәлдәрҙе йәшерергә ярамай», — тип билдәләне Радий Хәбиров.

Башҡортостан Башлығы пленар ултырыштағы сығышында яуаплы хеҙмәте һәм балаларҙы, йәштәрҙе әхлаҡи-патриотик тәрбиәләүгә ҙур өлөш индергәндәре өсөн республика педагогтарына рәхмәт әйтте.

«Башҡортостанда – илдәге иң ҙур мәғариф системаларының береһе. Беҙ Рәсәй Президентына, илдең Мәғариф министрлығына төбәктең тармаҡ башланғыстарына ярҙамы өсөн бик рәхмәтлебеҙ, — тине Радий Хәбиров. — Республикабыҙ «Профессионалитет» федераль проекты сиктәрендә булдырылған кластерҙар һаны буйынса илдә алдынғы урында. Беҙ шулай уҡ йыһазландырылған мәктәптәр һаны буйынса Волга буйы федераль округында – беренсе, ә Рәсәйҙә өсөнсө урынды биләйбеҙ, Бөтә Рәсәй уҡыусылар олимпиадаһының йомғаҡлау этабында ҡатнашыусылар һаны буйынса тәүге бишәү иҫәбенә индек».

Быйыл Башҡортостандың сығарылыш уҡыусылары БДИ йомғаҡтары буйынса юғары һөҙөмтәләр күрһәтте. Йөҙ балл йыйған эштәр һаны өстән бер өлөшкә артҡан (былтыр 159 булһа, быйыл 210). Халыҡ-ара кимәлдә уңыштар бар – Стәрлетамаҡтан 3-сө Башҡорт лицей-интернаты уҡыусыһы Руслан Әминев Ҡытайҙа IX халыҡ-ара иҡтисад олимпиадаһында көмөш миҙал яуланы.

«Республикала таланттар бик күп. Беҙҙең бурыс – уларҙы асыҡлау һәм бергәләп алға барыу, — тип билдәләне Радий Хәбиров. — Ғөмүмән, бындай уңыштар мәғариф системаһын нығытыу буйынса эшебеҙҙең һөҙөмтәле булыуын күрһәтә».

Башҡортостан Башлығы яңы уҡыу йорттарын төҙөүгә айырыуса иғтибар бүлде. Иң күләмле проекттар иҫәбендә — Өфөлә Республика математика лицей-интернатын төҙөү. Хәтерегеҙгә төшөрәбеҙ, яңыраҡ төбәк етәксеһе белем биреү учреждениеһының төҙөлөш майҙансығында булды.

«Мин илебеҙ Президентына мөрәжәғәт иттем. Владимир Владимирович беҙҙең башланғысты хупланы. Беҙ һәләтле балалар өсөн элиталы мәктәп асырға уйлайбыҙ. Попечителлек советына үҙем етәкселек итәм, — тине Радий Хәбиров. — Беҙ көслө уҡытыусылар командаһын туплауға тотондоҡ. Октябрҙә уҡыусыларҙы һайлап алыу башлана. Лицей 2027 йылдың 1 сентябрендә ишектәрен асасаҡ».

Киләһе йылда Өфөлә Вуз-ара студенттар кампусының 4 меңдән ашыу кешегә иҫәпләнгән төп корпусы ла эшләй башлаясаҡ. Унда заманса уҡыу, йәмәғәт һәм ижади киңлектәр булдырыласаҡ.

«Илдәге иң яҡшы кампус беҙҙә буласаҡ, — тип билдәләне Радий Хәбиров. — Был мәктәп тамамлаусылар республика вуздарына уҡырға инһен өсөн көслө аргумент. Беҙҙә көслө университеттар бар, һәм кампус, һис шикһеҙ, Башҡортостандың юғары белем биреү системаһын нығытасаҡ».

Башҡортостан Башлығы быйыл дүрт яңы мәктәпте, шул иҫәптән Өфөнөң «Кузнецов затоны» биҫтәһендә 2200 урынлыҡ белем усағын төҙөп бөтөүҙәре хаҡында һөйләне. Йыл аҙағына тиклем тағы дүрт уҡыу йорто эшләй башлаясаҡ, уларҙың һәр береһендә 1225 бала уҡыясаҡ. Өфөлә – өс, Нефтекамала бер мәктәп үҙ ишектәрен асырға әҙерләнә.

Яңы белем биреү учреждениеларын төҙөү менән бер рәттән төбәк мәктәптәрҙе ремонтлау федераль программаһында әүҙем ҡатнаша. Былтыр уның буйынса 35 бина яңыртылған. Быйыл 42 объектта эштәр алып барыла.

— Был беҙҙең мәктәптәрҙе тәртипкә килтереү өсөн уникаль мөмкинлек. Республика муниципалитеттары президент программаһының заявка биреү кампанияһында әүҙем ҡатнашырға тейеш, — тине Радий Хәбиров.

Башҡортостан Башлығы педагогик хеҙмәткәрҙәргә адреслы ярҙам сараларын билдәләне. Бында «Ауыл уҡытыусыһы» программаһы, балалар баҡсалары тәрбиәселәре һәм йәш мәктәп директорҙары өсөн гранттар хаҡында һүҙ бара. Бынан тыш, уҙған йылдан республика булышлығында мәктәп уҡытыусылары шифахана-курорттарҙа дауалана ала. Бер меңдән ашыу уҡытыусы ошо мөмкинлектән файҙаланған да инде.

«Июлдә Президент указы менән илебеҙҙә уҡытыусылар махсус статусҡа эйә булды, — тип билдәләне Радий Хәбиров. — Яҡын арала мин уҡытыусы һөнәренең абруйын күтәреү буйынса төбәк сараларын, шул иҫәптән педагогтар өсөн яңы дәүләт наградаһын — «Педагогик эшмәкәрлек өсөн» миҙалын булдырыу тураһында указға ҡул ҡуясаҡмын. Беҙҙең бурыс – уҡытыусыға юғары статусты ҡайтарыу».

Республика етәксеһе мәктәптәрҙә хәүефһеҙлекте арттырыуға етди иғтибар бүлде. Уҡыу йорттарының һаҡлау системаһын нығытыу менән бер рәттән педагогтарҙың һәм балаларҙың психологик һаулығын һаҡлау тураһында һүҙ бара. Был мәсьәләне хәл итеү буллингҡа ҡаршы программаларҙы, агрессия күренештәрен иҫкәртеүҙе, уҡыусыларҙың йәшәү сифатын контролдә тотоуҙы күҙ уңында тота.

«Хәүефһеҙлекте тәьмин итеү – мөһим бурыс. Йыл башында ошо йәһәттән өҫтәмә саралар тураһында ҡарар ҡабул иттек. 159 мәктәпте ике режимлы һаҡ системаһына күсерҙек. Директор урынбаҫарҙары араһынан тәрбиә һәм иҫкәртеү эшен ойоштороу өсөн яуаплылар тәғәйенләнек. Уларҙы артыҡ уҡыу йөкләмәһенән азат иттек, өҫтәмә түләү индерҙек, — тине Радий Хәбиров. — Яңы уҡыу йылы башланыр алдынан был эште камиллаштырыуҙың көнүҙәк мәсьәләләрен тикшереү өсөн директор урынбаҫарҙары менән осрашыу үткәрәсәкбеҙ».

Республика етәксеһе шулай уҡ мәктәп стоматологияһы кабинеттарын үҫтереү, педагогтарға медицина ярҙамы күрһәтеү һәм уҡыу йорттарында уҡытыусыларҙы ашатыу өсөн мөмкинлектәр булдырыу кәрәклеген билдәләне.

Сығыштың аҙағында Башҡортостан Башлығы кәңәшмәлә ҡатнашыусыларға дөйөм бурыс — махсус хәрби операцияға ярҙам итеү хаҡында иҫкә төшөрҙө.

«Республика Еңеү өсөн барыһын да эшләй. Рәсәй Президенты Владимир Владимирович Путин да был лозунгты билдәләне. Ошо маҡсатҡа өлгәшеү өсөн һәр кем үҙ урынында үҙ эшен башҡарырға тейеш, — тип билдәләне Радий Хәбиров. — Һеҙҙең өсөн, хөрмәтле уҡытыусылар, ул яугирҙәрҙең балалары хаҡында хәстәрлекте үҙ эсенә ала. Шул уҡ ваҡытта һәләк булған яугирҙәрҙең балаларына ҙур иғтибар биреү мөһим. Был бик яуаплы миссия».

Төбәк етәксеһе фиҙакәр хеҙмәте өсөн уҡытыусыларға тағы бер тапҡыр рәхмәт әйтте һәм уҡыу йорттары коллективтарына яңы уҡыу йылында уңыштар теләне.

«Беҙ уға ныҡлы белем биреү системаһы, ҙур өмөттәр һәм эшкә ышаныслы ҡараш менән инәбеҙ. Уның һөҙөмтәләре бар, шуға күрә бергәләп алға табан барыуыбыҙҙы дауам итәбеҙ», — тип йомғаҡ яһаны Радий Хәбиров.

Федерация Советының фән, мәғариф һәм мәҙәниәт буйынса Комитеты рәйесе Лилиә Ғүмәрова белем биреү өлкәһен үҫтереү буйынса мөһим закондар сығарыу башланғыстары хаҡында һөйләне. Сенатор «Профессионалитет» федераль проектын тормошҡа ашырыуға етди иғтибар бүлде һәм Башҡортостандың республикала булдырылған кластерҙар һаны буйынса икенсе урынды биләүе хаҡында әйтте.

«Был үҙенең һөҙөмтәлелеген иҫбатлаған стратегик проект. Башҡортостан – унда ҡатнашыу буйынса алдынғы төбәктәрҙең береһе. Бында Радий Фәрит улы Хәбиров етәкселегендәге команданың, колледждар етәкселәренең өлөшө ҙур», — тине Лилиә Ғүмәрова.

Пленар ултырышта ҡатнашыусыларҙы статс-секретарь — Рәсәйҙең мәғариф министры урынбаҫары Андрей Корнеев сәләмләне. Ул министрлыҡ ярҙамында тормошҡа ашырылған тармаҡ проекттарының һәм программаларының үҙенсәлектәренә ентекле туҡталды. Уҡытыусы һөнәренең абруйын күтәреү, белем биреү программаларын камиллаштырыу, уҡыу йорттарының матди базаһын нығытыу буйынса саралар сығыштың мөһим пункттары булды.

«Профилле вуздарға уҡырға ингәндә педагогик һөнәрҙәргә ихтыяждың арта барыуын теркәйбеҙ. Быйыл ил абитуриенттары 714 мең ошондай ғариза биргән. Был тенденция һаҡланыр тип ышанам. Ошо йүнәлештә Аҡмулла исемендәге Башҡорт дәүләт педагогия университеты ҡеүәтле кадрҙар әҙерләү үҙәге булып тора, — тип өҫтәне Андрей Корнеев. — Республикала педагогтарға ярҙам итеү өсөн яңы инструменттар һәм механизмдар индерелеүе ҡыуаныслы. Был ҡарарҙар һәм илебеҙҙең мәғариф системаһын үҫтереүгә индергән өлөш өсөн ҙур рәхмәт».

Республиканың мәғариф министры Илдар Мәүлитбирҙин үҙенең докладында тармаҡ үҫешенә йомғаҡ яһаны.

«Беҙ төп күрһәткестәр буйынса динамиканы һаҡлап ҡалдыҡ. Беҙҙең сығарылыш уҡыусылары йәнә БДИ-ла яҡшы һөҙөмтәләр күрһәтте, ә ете фән буйынса уртаса балл артты, ә туғыҙы буйынса — Рәсәй буйынса уртаса күрһәткестәренән юғарыраҡ», — тине Илдар Мәүлитбирҙин.

Республика мәктәптәрендә һөнәр алды кластары стандарттары тормошҡа ашырылды. Бының өсөн инженерия, тимер юл эше, машиналар эшләү һәм авиатөҙөлөш, энергетика, химия һәм нефть-газ сәнәғәте, медиа-һәм креатив технологиялар, ҡунаҡсыллыҡ индустрияһы һәм башҡа йүнәлештәр буйынса модель стандарттары төҙөлдө. Төбәктә бөтәһе 1462 һөнәри алды класы эшләй — был уҙған йылға ҡарағанда 710-ға күберәк. Улар 769 мәктәптә асылған. Уҡыусыларҙың һаны – 26 меңгә яҡын.

Мәғариф системаһындағы яңылыҡтар араһында – 2-8-се класс уҡыусыларының тәртибен баһалау.

«2026 йылдың 1 сентябренән ил Президенты Владимир Владимирович Путин ҡушыуы буйынса бөтә төбәктәрҙә лә ошондай эш башлана», — тип хәбәр итте министр.

Илдар Мәүлитбирҙин уҡыусыларҙың именлеген тәьмин итеү, оҙайтылған көн төркөмдәрен ойоштороу, уҡытыусыларға грант ярҙамы һәм педагог һөнәренең абруйы, инфраструктураны яңыртыу хаҡында ла һөйләне. Атап әйткәндә, 2026 йылда «Йәштәр һәм балалар» милли проекты сиктәрендә 879 мәктәп ИЗО, музыка һәм физика фәндәрен уҡытыу өсөн заманса ҡорамалдар менән йыһазландырылған.

Башҡортостан буйынса эске эштәр министры урынбаҫары Артур Сәйфуллин республиканың педагогтар берләшмәһенең иғтибарын балалар һәм уларҙың ата-әсәләре менән һанлы хәүефһеҙлекте тәьмин итеү буйынса профилактик эш алып барыу кәрәклегенә йүнәлтте. Мәғлүмәт технологиялары ярҙамында ҡылынған енәйәттәр кимәле элеккесә юғары булып ҡала, тип билдәләне докладсы. 2026 йылда ғына республика халҡы 1,75 миллиард һум аҡсаһын юғалтҡан.

«Беҙ мәктәп йыйылыштарында даими ҡатнашабыҙ, уҡытыусылар коллективтарында әңгәмәләр үткәрәбеҙ, — тип билдәләне Артур Сәйфуллин. — Мутлашыусылар яңы алымдар һәм һылтауҙар уйлап таба, шуға күрә хеҙмәттәшлекте артабан да дауам итергә кәрәк, бигерәк тә бәлиғ булмағандар менән эшләгәндә, сөнки уларға йыш ҡына еңел аҡса эшләргә тәҡдим итәләр. Ә бының өсөн етди яза саралары ҡаралған. Был хаҡта һөйләү зарур».

Рәсәйҙең «Белем» йәмғиәтенең мәғариф ойошмалары менән эшләү департаменты директоры Альбина Бикбулатова балаларҙы һәм йәштәрҙе уҡытыу һәм тәрбиәләү, ата-әсәләр менән эшләү проекттары хаҡында һөйләне.

«Һәр мәктәптә йылына ике тапҡыр ата-әсәләр йыйылышына лекторҙар бирергә әҙербеҙ. Етәкселәрҙән, директорҙың тәрбиә эше буйынса урынбаҫарҙарынан һәм класс етәкселәренән методикаларыбыҙҙы һәм видеоматериалдарыбыҙҙы файҙаланыуҙарын һорайбыҙ», — тип билдәләне Альбина Бикбулатова.

МХО-ла ҡатнашыусы, Сибайҙың 3-сө Республика полилингваль күп профилле гимназияһы уҡытыусыһы Эдуард Бикташев йәш быуынды мәктәп эскәмйәһенән үк хәрби-илһөйәрлек рухында тәрбиәләүҙең мөһимлеген һыҙыҡ өҫтөнә алды. Педагог «Патриот» паркында өлкән класс уҡыусылары өсөн йыйындар ойошторған өсөн республика етәкселегенә рәхмәт белдерҙе.

«Пилотһыҙ осоу аппараттары, һанлы технологиялар һәм заманса конфликттар дәүерендә илдең именлеген тәьмин итергә һәләтле кешенең ниндәй булырға тейешлеге тураһында төшөнсә үҙгәрә. Беҙ физик яҡтан ҡыйыу һәм көслө егет-ҡыҙҙар ғына түгел, интеллектуалдар ҙа үҫтерергә тейешбеҙ. Инженер фекерләүгә эйә белгес илебеҙ өсөн бик файҙалы була ала. Математиканы һәм физиканы яҡшы белгәндәр киләсәктә беҙҙең ҡалҡан буласаҡ, — тине Эдуард Бикташев. — «Патриот» паркы — балаларҙы тейешле предметтарҙы тәрән өйрәнеү өсөн шарттар булдырылған, практик оҫталыҡты һәм шәхси сифаттарҙы формалаштырырға ярҙам иткән яҡшы урын».

Һуңынан республика етәксеһе кәңәшмәлә ҡатнашҡан өсөн абруйлы ҡунаҡтарға рәхмәт әйтте һәм иң яҡшы педагогтарға Башҡортостандың дәүләт наградаларын тапшырҙы.

«Бөгөн беҙ мөһим мәғлүмәт менән алмаштыҡ һәм акценттарҙы билдәләнек. Мәғариф системаһын үҫтереү беҙҙең өсөн милли идея булып тора,  — тине Радий Хәбиров. — Балаларыбыҙ йәшәгән ошо конкурентлы донъяла, әгәр был темаға тейешле иғтибар бирмәһәк, оҙаҡ ваҡытҡа еңеләсәкбеҙ. Йәш быуын – беҙҙең киләсәк, уларға Башҡортостандың артабанғы үҫешен тәьмин итергә кәрәк. Педагогтарға эштәре өсөн рәхмәт! Яңы уҡыу йылында уңыштар теләйем».

Республикала уҡыу йылы башланыр алдынан мәктәптәргә яңы автобустар тапшырыу изге йолаға әүерелде. Был юлы ла шулай булды. Автопарк даими яңыртылып тора. Мәктәп директорҙары Башҡортостан Башлығы ҡулынан асҡыстар алды.

Сираттағы партияға республика бюджеты иҫәбенә һатып алынған 10 «ВЕКТОР NEXT» автобусы инде. Улар Өфө ҡалаһы, Әбйәлил, Ейәнсура, Ишембай, Илеш, Стәрлебаш, Өфө һәм Федоровка райондарының һигеҙ мәктәбенә тапшырылды.

Бөтәһе 25 урынға иҫәпләнгән автобустар балаларҙы ташығанда хәүефһеҙлек талаптарына яуап бирә, хәүефһеҙлек ҡайыштары, тахографтар, спутник навигацияһы менән йыһазландырылған.

«Беҙҙең республикала уҡыу йылы башланыр алдынан мәктәптәргә яңы автобустар тапшырыу яҡшы йолаға әүерелде. Быйыл федераль аҡса иҫәбенә һатып алынған тағы 59 автобус көтәбеҙ. Рәсәйҙең Мәғариф министрлығына һәм министр Сергей Сергеевич Кравцовҡа мәктәп автопаркын яңыртыу эшенең даими алып барылыуы өсөн рәхмәтлебеҙ. Сөнки балалар яҡшы, уңайлы, заманса шарттарҙа уҡырға йөрөргә тейеш, — тине Радий Хәбиров. — Водителдәргә ҙур рәхмәт. Эшегеҙ бик яуаплы. Мәктәпкә юлдар имен булһын!»

Башҡортостанда 2805 тораҡ пунктта урынлашҡан 876 мәктәптең 56 532 уҡыусыһы мәктәпкә автобус менән йөрөй. Йәмғеһе 1567 мәктәп автобусы бар. Уҙған йылда ғына республика муниципалитеттары федераль һәм төбәк бюджеттары иҫәбенә һатып алынған 207 яңы автобусҡа эйә булды.

Йәйге каникулдарҙан һуң күп кенә ҡала һәм райондар, шул иҫәптән Ишембай уҡыусылары ла үҙ мәктәптәрен танымай. Дәүләт программаһы сиктәрендә ҡаланың 22 мәғариф объектының11-е яңы һулыш алды. Август кәңәшмәһе башланғансы Радий Хәбиров ҡунаҡтар менән бергә уларҙың береһен барып ҡараны.

19-сы мәктәптең матди-техник базаһын капиталь ремонтлауға һәм яңыртыуға 115 миллион һумдан ашыу аҡса бүленгән.

Учреждение директоры Ришат Мөхәмәҙиев һүҙҙәренсә, 1993 йылда төҙөлгән уҡыу йортонда 860 бала шөғөлләнә. 8-9-сы кластарҙа – медицина, педагогика һәм инженер йүнәлештәре буйынса һөнәр алды уҡытыу, өлкән класс уҡыусылары өсөн технологик класс ойошторолған. Уҡыусылар иҫәбендә – Бөтә Рәсәй уҡыусылар олимпиадаһының муниципаль этаптарының 21 еңеүсеһе һәм призёры. «Башҡортостан сода компанияһы» конкурсында еңгән өсөн грант ярҙамында химия кабинеты өсөн яңы ҡорамалдар һатып алынған һәм йәштәр башланғыстары үҙәге тәртипкә килтерелгән.

Радий Хәбиров уҡытыусылар бүлмәһен, тамашалар залын, яңыртылған уҡыу кабинеттарын ҡараны. Ике кабинетта өлкән класс уҡыусылары сентябрҙә үтәсәк физика һәм химия буйынса олимпиадаларға әҙерләнгән. Республика етәксеһе уларға уңыштар теләне, шулай уҡ Өфөнөң Вуз-ара студенттар кампусы мөмкинлектәре тураһында һөйләне. Төҙөкләндерелгән мәктәп бик матур, уҡыу йылының башланыуын түҙемһеҙлек менән көтәбеҙ, тине балалар.

Уҡыусылар менән аралашҡанда Радий Хәбиров уларҙың аттестат алғандан һуң ҡайҙа уҡырға инергә йыйыныуҙары менән ҡыҙыҡһынды. Күпселек Өфө фән һәм технологиялар университетын һәм Башҡортостандың башҡа алдынғы юғары уҡыу йорттары һайлаған.

Яғыулыҡ-энергетика комплексы предприятиеларында эшкә урынлашыу өсөн урта һөнәри белемде тыуған ҡалала ла алырға мөмкин. Яңы уҡыу йылында Ишембай нефть колледжының 2 меңгә яҡын студенты көндөҙгө һәм ситтән тороп уҡыу формалары буйынса талап ителгән һөнәрҙәрҙе үҙләштерәсәк. Алған теоретик белемен улар нефть һәм газ сығарыу полигонында практикала нығыта аласаҡ.

Радий Хәбиров учреждение етәкселеге менән уны артабан үҫтереү пландарын тикшерҙе.

Колледж директоры вазифаһын башҡарыусы Мират Йәнбәков һөйләүенсә, яңы уҡыу йылында 1,8 меңдән ашыу студент көндөҙгө һәм ситтән тороп уҡыу бүлектәрендә талап ителгән һөнәрҙәр аласаҡ. Сит ҡаланыҡылар өсөн уҡыу йортонда 300 урынлыҡ ятаҡ бар.

Әйткәндәй, колледж илдең эре нефть һәм газ компаниялары менән килешеүҙәр төҙөгән. Шуға сығарылыш уҡыусыларының яғыулыҡ-энергетика комплексының алдынғы предприятиеларына үҙ һөнәре буйынса эшкә урынлашыу мөмкинлеге бар. Мәҫәлән, быйыл 95 кеше «Башнефть» предприятиеларында эшләй башлаған.

Киләһе йылда колледж республика һәм индустриаль партнерҙар ярҙамында заманса белем биреү кластерын булдырыу өсөн «Профессионалитет» федераль программаһында ҡатнашыуға ғариза бирергә планлаштыра.

– Уҡыу йорто йәштәр араһында бик популяр, бында бюджет урындарына конкурс юғары. Шуға күрә студенттарҙы ҡабул итеүҙе арттырыу, уларҙы әҙерләү сифатын күтәреү мөһим, – тип билдәләне Радий Хәбиров «Башинформ» журналисы менән әңгәмәлә. – Беҙ учреждениены ҙур, көслө колледж итеп яңыртыу тураһында ҡарар ҡабул иттек, «Профессионалитет» программаһына инергә планлаштырабыҙ. Бынан тыш, дөйөм ятаҡты яңыртыу өсөн федераль аҡса йәлеп итәсәкбеҙ.

Радий Хәбиров «Башинформ» хәбәрсеһенә интервьюһында республиканың мәғариф системаһы яңы уҡыу йылына һәйбәт әҙерләнеүе хаҡында һөйләне.

«Минеңсә, беҙ кәрәкле нәмәләрҙең барыһын да эшләнек, хәҙер именлекте тәьмин итеүгә ҙур иғтибар бүләбеҙ.

Уҡытыусының бурысы изге һәм беҙ был һөнәрҙең абруйын ҡайтарырға тейешбеҙ. Атайым да, әсәйем дә уҡытыусылар булды. Минеңсә, һәр нормаль кеше үҙенең уҡытыусыһын яратырға һәм хөрмәт итергә тейеш. Миңә бәхет йылмайҙы, мин физкультура һәм физиканан уҡытҡан уҡытыусыларыма дәүләт наградаларын тапшырҙым. Күҙ алдына килтерәһегеҙме? Бына миңә нисә йәш, улар иҫән-һау, Аллаһҡа шөкөр», – тине Радий Хәбиров.