Өфөлә Дәүләт ҡурайсылар ансамбле етәксеһе Азат Айытҡолов юбилейын билдәләне

– Азат Миңлеғәле улы – башҡорт халҡының данлы улы, милли уйын ҡоралыбыҙ ҡурайҙы бар донъяға танытҡан музыканттарҙың береһе ул. Артабан да үҙ сәнғәтегеҙ менән ҡыуандырырһығыҙ һәм тәжрибәгеҙҙе йәш быуынғатапшырырһығыҙ тип ышанабыҙ. Беҙ һеҙҙең менән ғорурланабыҙ! – тип билдәләне Башҡортостандың мәҙәниәт министры урынбаҫары Ринат Ғайсин һәм республика етәксеһе Радий Хәбировтың ҡотлауын уҡып ишеттерҙе.

Юбилярҙы Өфө хакимиәте вәкилдәре, Башҡортостандың халыҡ артистары Рәшиҙә Туйсина, Рәсүл Ҡарабулатов һәм башҡа коллегалары, филармония солистары, ҡурайсылар һәм мэтрҙың уҡыусылары тәбрикләне. Концертта Азат Миңлеғәле улы етәкләгән Башҡортостандың Дәүләт ҡурайсылар ансамбле сығыш яһаны.

– Үҙемә 70 йәш тулыуына ышанмайым. Мин йәштәр менән эшләйем, студенттарым бар, ә йәштәр араһында ҡартайырға ярамай, һәр ваҡыт тонуста булырға кәрәк, – тине Азат Миңлеғәле улы. – Мин бер ҡасан да бындай юбилей булыр тип уйламағайным. Ғүмерем буйына эшләнем. Йәш сағымда үҙемде ялҡау тип иҫәпләй инем, ялҡаулыҡты еңергә мөмкин, айырыуса эшеңде яратһаң. Мин 48 йыл филармонияла эшләйем, был осор бер йыл кеүек үтте лә китте. Гастролдәр географияһы киң, программаларым күп, репертуарым ҙур, бик күп уҡыусыларым бар. Мин һәр ваҡыт күңелемде һалып эшләнем. Бигерәк тә бәләкәй балалар менән эшләгәндә ихлас булырға кәрәк. Уйын ҡоралын һәм уҡыусыларҙ яратһаң, барыһы ла килеп сыға. Ә ҡурайсылар ансамбле – эшмәкәрлегемдең иң юғары баҫҡысы.

Азат Айытҡолов – С. Юлаев исемендәге дәүләт премияһы лауреаты,  Салауат Юлаев ордены кавалеры, Йылайыр районының почетлы гражданы.

https://www.bashinform.ru/news/culture/2026-02-20/v-ufe-rukovoditel-gosansamblya-kuraistov-azat-aitkulov-otmetil-yubiley-4586781