Өфөлә күренекле башҡорт композиторы Роза Сәхәүетдинова мәрхүм булды

Өфөлә күренекле башҡорт композиторы Роза Сәхәүетдинова арабыҙҙан китте. Уға 88 йәш ине.

Роза Сәхәүетдинова — Рәсәйҙең һәм Башҡортостандың атҡаҙанған артисы, Башҡортостандың халыҡ артисы, Салауат Юлаев ордены кавалеры, Мифтахетдин Аҡмулла һәм Рәми Ғарипов исемендәге премиялар лауреаты. Уның бай ижади эшмәкәрлегенә яҡынса 700 музыкаль әҫәр һыйған. Сағыу, бер тыңлауҙа иҫтә ҡалырлыҡ йырҙары күп кенә популяр йырсыларҙың репертуарына инә, ысын халыҡ йырҙарына әүерелә.

Республика мәҙәниәт министрлығының матбуғат хеҙмәтенән хәбәр итеүҙәренсә, күренекле шәхесте иртәгә, 28 ноябрҙә, һуңғы юлға оҙатасаҡтар. Матәм сараһы иртәнге сәғәт 11-ҙә Х. Әхмәтов исемендәге Башҡорт дәүләт филармонияһында башлана.

Роза Сәхәүетдинова 1937 йылдың 25 июнендә Тажикстандың Дүшәнбе ҡалаһында донъяға килә. Бөйөк Ватан һуғышынан һуң ата-әсәһе Башҡортостанға Шишмә ауылына күсеп ҡайта. Ул мәктәпте тамамлағас, Башҡорт дәүләт университетының физика-математика факультетына уҡырға инә. Күп тә үтмәй, ҡыҙҙы Фәйзи Ғәскәров етәкселегендәге халыҡ бейеүҙәре ансамбленә эшкә саҡыралар, һәм ул уҡыуын ташлай.

Билдәле артистар Зәки Мәхмүтов, Ғәлиә Солтанова, Ғата Сөләймәнов, Фәриҙә Ҡудашева менән эстрада бригадаларында эшләй. Филармонияла алған тәжрибәһе уның музыка өлкәһендәге уңыштарына нигеҙ һала.

Роза Сәхәүетдинова 1971 йылда Өфө сәнғәт техникумын тамамлай. Училищенан һуң Өфөнөң 100-сө дөйөм белем биреү мәктәбендә эшләй, унда балалар хоры студияһы ойоштора. Роза Хәйҙәр ҡыҙы 70-се йылдарҙа йырҙар ижад итә башлай. Башҡортостан телевидениеһында тауыш режиссёры булып эшләгән йылдарҙа ла йырҙар яҙа. 1991 йылда СССР-ҙың Композиторҙар союзына алына. Союзға ингәндә рекомендацияны уға ойошма рәйесе Тихон Хренников үҙе бирә.

Роза Хәйҙәр ҡыҙы — хор, инструменталь әҫәрҙәр, башҡорт шағирҙары Мостай Кәрим, Рауил Бикбаев, Сафуан Әлибаев, Рәми Ғарипов, Муса Сиражи, Тамара Ғәниева һәм рус шағирҙары Сергей Есенин һәм Марина Цветаева шиғырҙарына йырҙар авторы. Уның әҫәрҙәре араһында драма спектаклдәренә һәм радиопостановкалар өсөн көйҙәр ҙә бар.

Роза Сәхәүетдинованың йырҙары Ренат Ибраһимов, Хәйҙәр Бегичев, Фәрит Бикбулатов, Роза Рымбаева, Флүрә Килдейәрова, Нәзифә Ҡадырова, Тәнзилә Үҙәнбаева, Фәнүнә Сиражетдинова, Фәнәүи Сәлихов һәм башҡа артистарҙың репертуарына ингән. Эстрада йондоҙҙары башҡарыуындағы йырҙары «Мелодия» Бөтә Союз фирмаһының пластинкаларына яҙҙырылған.

Төрлө йылдарҙа йыр йыйынтыҡтары донъя күрә: «Ғашиҡтар, һеҙгә өндәшәм!», «Аҡҡош күле», «Осҡондар», «Фортепиано өсөн балалар йырҙары һәм пьесалары», «Һандуғас көйҙәре», «Тыуған яҡҡа ҡайтманылар», «Сергей Есенин һәм Марина Цветаеваның шиғырҙарына романстар», Гөлшат Зәйнәшеваның шиғырҙарына «Йырҙар һәм романстар», фортепиано өсөн балалар һәм үҫмерҙәр пьесалары йыйынтығы, Рәми Ғарипов шиғырҙарына яҙылған «Тормош» йыйынтығы.

«Башинформ» мәрхүмәнең яҡындарының һәм туғандарының ауыр ҡайғыһын уртаҡлаша.