Башҡортостанда тәүге тапҡыр Милли бейеү көнө билдәләнә

Башҡортостанда тәүге тапҡыр Милли бейеү көнө билдәләнә. Хәтерегеҙгә төшөрәбеҙ, тейешле указға республика етәксеһе Радий Хәбиров ҡул ҡуйғайны. 

21 октябрь осраҡлы ғына һайланмаған, сөнки был көндө легендар бейеүсе һәм хореограф, РСФСР-ҙың һәм Башҡорт АССР-ының атҡаҙанған сәнғәт эшмәкәре Фәйзи Ғәскәров тыуған. Хәҙер республиканың дәүләт академия халыҡ бейеүҙәре ансамбле уның исемен йөрөтә.

«Бейеү теле бөтәһенә лә аңлашыла. Унда матурлыҡ һәм һомғоллоҡ, үткәндәр хаҡында иҫтәлек һәм киләсәккә ынтылыш бар. Ул теләһә ниндәй сиктәрҙе үтеп, дуҫлыҡ һәм тыныслыҡ хаҡына кешеләрҙе берләштерә ала. Ә хәҙер был – иң мөһиме.

Башҡортостанда төрлө халыҡ вәкилдәре дуҫ һәм татыу йәшәй. Улар барыһы ла ата-бабаларының бейеү традицияларын һаҡлай һәм үҫтерә.

Милли бейеү көнө республиканың мәҙәни мираҫын һаҡлау һәм арттырыу йәһәтенән тағы ла бер мөһим аҙым булыр тип ышанам», – тип яҙҙы Радий Хәбиров үҙенең телеграм-каналында.

«Башинформ» хәбәр иткәнсә, «Башҡортостан» дәүләт концерт залында тәүге Милли бейеү көнөн ҙур концерт менән билдәләйҙәр. Программала – башҡорт хореографияһының алтын фондынан тарихты һәм халыҡ йолаларын сағылдырған легендар бейеүҙәр.

https://www.bashinform.ru/news/culture/2025-10-21/v-bashkirii-vpervye-otmechayut-den-natsionalnogo-tantsa-4435454