Башҡорт костюмы студияһы — «Алтын майҙан» фестивале лауреаты

Республика халыҡ ижады үҙәгенең «Селтәр» башҡорт халыҡ костюмы студияһы Ҡытайҙа «Алтын майҙан» халыҡ-ара традицион мәҙәниәттәр фестиваленең l-се дәрәжә лауреаты исеменә лайыҡ булды.

«Алтын майҙан» халыҡ-ара фестивале Ҡытайҙың Циньхуандао ҡалаһында 8-13 сентябрҙә үтте. Ҡытай тарихында тәүге тапҡыр фестивалдә Рәсәйҙән 70 ижади коллектив ҡатнашты. Уларҙың ижады этностың мәҙәни кодын, халыҡтың тере хәтерен үҙ эсенә алған йырҙарҙы, бейеүҙәрҙе, йолаларҙы, халыҡ-ҡулланма сәнғәтен һаҡлауға йүнәлтелгән.

Фестивалдең маҡсаты — сәнғәт һәм ижад аша халыҡтар араһында берҙәмлекте һәм гармонияны нығытыу.

«Ҡытайҙағы фестиваль Рәсәй халҡының бай традицияларын һәм ҡытай мәҙәниәтенең башҡа мәҙәниәттәр менән бәйләнештәр булдырыуға асыҡ булыуын күрһәтте. Был бөгөн айырыуса көнүҙәк, сөнки тыныслыҡҡа һәм татыулыҡҡа ынтылыш халыҡ-ара көн тәртибендә өҫтөнлөклө урын биләй», — тип хәбәр итте студия етәксеһе Фатима Хәйретдинова.

Фестиваль Донъя халыҡтары ассамблеяһының мәғлүмәти ярҙамында Бисер Киров исемендәге «Алтын майҙан» интернациональ мәҙәни-ағартыу проекты сиктәрендә үтте.

https://www.bashinform.ru/news/culture/2025-09-16/studiya-bashkirskogo-kostyuma-stala-laureatom-festivalya-zolotaya-ploschad-4390398