Ҡазанда республикабыҙҙа тыуып үҫкән яҙыусы Фәтих Кәримгә һәйкәл асылды

Ҡазанда яҙыусы, фронтовик шағир, сығышы менән Башҡортостандан булған Фәтих Кәримгә һәйкәл асылды. Татарстан рәйесе Рөстәм Миңлеханов ҡатнашлығындағы «Йәштәр» скверындағы сара Бөйөк Ватан һуғышында Еңеүҙең 80 йыллығына арналды. Был хаҡта «Башинформ»ға Татарстан башҡорттары ҡоролтайы рәйесе урынбаҫары Тимур Йосопов хәбәр итте.

Фәтих Кәримде ике республиканы берләштергән шағир тип йөрөтәләр. Һәйкәл эскизы авторҙары – Мәскәү скульпторҙары Денис Мельников һәм Захар Карамян. Монументты төҙөүгә биш йыл ваҡыт талап ителде. Эскиз уның ҡыҙы Ләйлә Фәтих ҡыҙы иҫән сағында уҡ һөйләшеп килешелгән.

Фәтих Кәрим 1908 йылдың 27 декабрендә (1909 йылдың 9 ғинуарында) Айыт ауылында (хәҙерге Бишбүләк районы) тыуған. Башланғыс белемде лә ошонда алған, 1922 йылда Бәләбәй педагогия техникумына уҡырға ингән. 1942 йылдың февраленән 1945 йылдың февраленә тиклем Фәтих Кәрим фронттың алғы һыҙығында дошманға ҡаршы һуғыша. I дәрәжә Бөйөк Ватан һуғышы ордены менән бүләкләнгән, башҡа наградалары бар. Был осорҙа шиғырҙары фронт гәзиттәрендә баҫыла, әҫәрҙәрен халыҡ яратып уҡый.

Яҙыусының исеме тыуған республикаһында ла мәңгеләштерелде. Бәләбәй һәм Бишбүләк райондары хакимиәттәре Фәтих Кәрим исемендәге премия булдырҙы, уның тыуған ауылында музей асылды һәм бюст ҡуйылды, Айыт мәктәбе шағирҙың исемен йөрөтә.

https://www.bashinform.ru/news/culture/2025-05-12/v-kazani-otkrylsya-pamyatnik-pisatelyu-urozhentsu-bashkirii-fatihu-karimu-4231401