Сибайҙа Советтар Союзы Геройы Таһир Күсимов тураһында спектакль сәхнәләштерелде

Сибайҙа «Ҡанатлы генерал» спектакленең премьераһы булды. Бөйөк Ватан һуғышында Еңеүҙең 80 йыллығы йылында Арыҫлан Мөбәрәков исемендәге Сибай башҡорт драма театрының баш режиссеры Денис Нурғәлин Хәмит Ирғәлин пьесаһы буйынса спектакль ҡуйҙы.

Хәрби драмала генерал-майор, Советтар Союзы Геройы Таһир Күсимовтың тормошо һәм хәрби юлы сағыла. Драманың йөкмәткеһе төп геройҙың тормошон үҙгәрткән ваҡиғалар менән тулы. Артистар геройҙарының хис-тойғоларын еткерә алды, образдар һәр кемгә аңлайышлы, ти спектаклде ҡараған тамашасылар. Башҡорт халҡының данлы улы, һуғыш йылдарында 112-се Башҡорт кавалерия дивизияһының беренсе полкы командиры Таһир Күсимов тамашасылар алдында ябай ауыл көтөүсеһенән генерал дәрәжәһенә еткән сағыу шәхес булып баҫты.

Таһир Күсимов ролен – Рәсәйҙең атҡаҙанған, Башҡортостандың халыҡ артисы Риф Сәйфуллин, ҡатыны Сәйҙәне Башҡортостандың халыҡ артисы Айгөл Хәкимова башҡарҙы. Йәш Күсимов образын актер Нәфис Сәйетов кәүҙәләндерҙе.

Спектаклгә әҙерлек барышында коллектив геройҙың тыуған яғында – Әбйәлил районының Күсем ауылындағы музейҙа булды. Артистар үҙенсәлекле экспонаттар менән танышты.

Спектаклдең композиторы - Башҡортостандың атҡаҙанған сәнғәт эшмәкәре Урал Иҙелбаев. Хореограф —Башҡортостандың атҡаҙанған артисы Фәнил Әсәҙуллин, сәхнә биҙәлеше – Рөстәм Баймөхәмәтов.

https://www.bashinform.ru/news/culture/2025-05-07/v-bashkirii-postavili-spektakl-o-geroe-sovetskogo-soyuza-tagire-kusimove-4227333