Башҡортостандың халыҡ артисы Андрей Малаховтың йыр шоуында ҡатнашты

Башҡортостандың халыҡ артисы Артур Туҡтағолов Андрей Малаховтың «Рәсәй-1» телеканалында барған популяр тапшырыуында ҡатнашты. «Ихлас күңелдән йырҙар» шоуында Башҡортостанға 15 минут ваҡыт бүленде.

Артур Туҡтағолов бер нисә йыр башҡарҙы. Яҡташыбыҙ Башҡортостан брендтары тураһында йырлай-йырлай Андрей Малаховҡа башҡорт балы һәм сәк-сәк бүләк итте.

— Илебеҙҙең баш ҡалаһына юлланыр алдынан уҡ мин Мәскәүҙән килгән ижади төркөмдө изге Торатауыбыҙға алып барҙым. Унда беҙ «Сал Урал», «Шайморатов генерал» хиттарын башҡарҙыҡ. Мәскәүҙәргә милли колоритыбыҙҙы күрһәтергә теләнек. Студияла үҙебеҙҙең «Далан-стайл» («Gangnam Style» ремиксы), «Ҡырағай бал» йырҙарын йырлап күрһәттек. Беҙҙең сығышты йәмләргә Мәскәүҙә йәшәгән яҡташтарыбыҙ ҙа килде, ҡурайсыны ла Мәскәүҙә таптыҡ. Хуплаусылар күп булды, һинең менән ғорурланабыҙ, тип яҙалар миңә, — тип тәьҫораттары менән уртаҡлашты артист.

Мәскәү ҡурайсыһы һәм баянсыһы Хәйҙәр Хәмиҙуллин «Ҡыҙыл йондоҙ» йыр һәм бейеү ансамблендә эшләй. Ул программала билдәле «Кондорҙың осоуы» көйөн уйнаны. Тапшырыуҙы төшөргәндә йылы, дуҫтарса мөхит бик оҡшаны, ти студияға килгән «Гөлдәр» ансамбле ҡыҙҙары.

«Шоу командаһы беҙгә уңайлы булһын өсөн барыһын да эшләне. Тамашасыларҙың алҡыштары һәм йылмайыуы көс-дәрт өҫтәне! Артур Туҡтағолов шул хәтлем ҙур тәьҫир ҡалдырҙы. Уның таланты һәм харизмаһы беҙҙе рухландырҙы, һоҡландырҙы. Был шәп тәжрибә булды, беҙ быны оҙаҡ онотмаҫбыҙ!» — ти яҡташтарыбыҙ.