Сосланбәк Тавасиевтың ейәне Башҡортостан хаҡында тәьҫораттары менән уртаҡлашты

VI Бөтә донъя башҡорттары ҡоролтайы ҡунаҡтары араһында билдәле совет скульпторы, БАССР-ҙың халыҡ рәссамы Сосланбәк Тавасиевтың ейәне лә бар. Әйткәндәй, Ростан Тавасиев та рәссам (һынлы сәнғәт, скульптура һәм графика менән шөғөлләнә), ул Башҡортостан тураһында тәьҫораттары менән уртаҡлашты.

«Олатайымдың исеме онотмағандары өсөн бик шатмын. Бөтә донъя башҡорттары ҡоролтайы булдырған С.Тавасиев исемендәге премия талантлы кешеләргә бирелә, уны тапшырыу тантанаһында ҡатнашыу – минең өсөн оло мәртәбә. Башҡортостанда беренсе тапҡыр ғына түгелмен, бында һәр саҡ ҡыуанып киләм, тағы килермен», – тине Ростан Тавасиев.

Ул олатаһы эшләгән Салауат Юлаев һәйкәлен реконструкциялауға ҡарата үҙ фекерен белдерҙе.

«Был мәсьәләлә эксперттарға ышаныу мөһим тип уйлайым. Беҙ бит табип диагнозына шик белдермәйбеҙ, дарыу эсергәме-юҡмы икән тип уйлап тормайбыҙ. Һәйкәлгә килгәндә, мин профессионалдарҙың фекеренә ышанам», – тип билдәләне Тавасиев.

https://www.bashinform.ru/news/culture/2024-12-13/vnuk-soslanbeka-tavasieva-podelilsya-vpechatleniyami-o-bashkirii-4051157