Яҙыусылар союзының элекке рәйесе Башҡортостандың Әҙәбиәт музейына етәксе итеп тәғәйенләнде

Башҡортостан Яҙыусылар союзының элекке рәйесе Зәки Әлибаев республиканың Милли әҙәбиәт музейына етәксе итеп тәғәйенләнде. Коллективты яңы етәксе менән Башҡортостандың мәҙәниәт министры урынбаҫары Илнур Мөхйәнов таныштырҙы.

Быға тиклем ике йыл дауамында Әҙәбиәт музейы директоры булып яҙыусы Миләүшә Ҡаһарманова эшләне. Музейҙа белдереүҙәренсә, ул «Башҡортостан ҡыҙы» журналына баш мөхәррир итеп тәғәйенләнеүгә бәйле вазифаһын ҡалдырҙы.

Зәки Әлибаев — әҙәбиәт белгесе, тәнҡитсе, филология фәндәре кандидаты. 1992 йылдан – Башҡорт дәүләт университеты, 2009 йылдан Мифтахетдин Аҡмулла исемендәге Башҡорт дәүләт педагогия университеты уҡытыусыһы, 2017-2022 йылдарҙа Башҡортостандың Яҙыусылар союзы рәйесе булып эшләй. Башҡортостан Республикаһының атҡаҙанған мәғариф хеҙмәткәре, Салауат Юлаев ордены кавалеры.

https://www.bashinform.ru/news/culture/2024-12-11/eks-predsedatel-soyuza-pisateley-vozglavil-literaturnyy-muzey-bashkirii-4047934