Башҡортостанда төшөрөлгән фильм «ЭФИР74» Бөтә Рәсәй кинофестивалендә еңеү яуланы

Силәбелә тәбиғәт һәм кеше тураһында «ЭФИР74» XII Бөтә Рәсәй фестивале тамамланды. Быйыл фестивалдең эксперт советы донъяның 83 иленән килгән 1200-ҙән ашыу ғаризаны ҡараны. Исемлектә профессиональ киностудияларҙан һәм ирекле авторҙарҙан иң яҡшы 25 фильм бар ине.

Һигеҙ еңеүсе араһында — башҡорт режиссеры Фәрзәнә Утарбаеваның ҡыҫҡа метражлы «Нигеҙ» фильмы. Кинокартина фестиваль партнерҙарынан бүләктәр менән баһаланды.

— Башҡорт кинематографын халыҡ-ара һәм Рәсәй фестивалдәрендә күрһәтеү — минең өсөн оло мәртәбә. Фильмдың юғары баһаланыуы өсөн бик шатмын. Кисә Краснодарҙан да шылтыраттылар, бүләкләү тантанаһына саҡырҙылар, — тип уңыштары менән уртаҡлашты Фәрзәнә Утарбаева.

«Башинформ» хәбәр иткәнсә, быйыл майҙа «Нигеҙ» фильмы Чебоксар халыҡ-ара кинофестивалендә тамашасылар һөйөүе призына лайыҡ булды. Шулай уҡ Көньяҡ Кореяла бар донъянан ни бары 15 фильм һайлап алынған SMVFF (Supbatdeul Mountain Village Film Festival — Supbatdeul) кинофестивалендә күрһәтелде.

https://www.bashinform.ru/news/culture/2024-10-23/film-iz-bashkirii-pobedil-na-vserossiyskom-kinofestivale-efir74-3981031