Башҡорт дәүләт ҡурсаҡ театрында яңы миҙгел асыла

Башҡорт дәүләт ҡурсаҡ театры 93-сө ижад миҙгелен асырға әҙерләнә. Быйыл — яңыртылған, заманса һәм уңайлы бинала, тип яҙа республика етәксеһе Радий Хәбиров үҙенең телеграм-каналында.

«2023 йылдың декабренән алып бында 462 спектакль сәхнәләштерелде, 81 149 тамашасы ҡараны, — тине ул. — Декабрь хаҡында яҙам, сөнки тап шул ваҡытта артистар «Мәҙәниәт» милли проекты буйынса күләмле реконструкциянан һуң тәүге спектаклен ҡуйҙы».

Яңы миҙгелдә премьералар, республика буйлап гастролдәр, фестивалдәрҙә ҡатнашыу ҡаралған. 26-29 сентябрҙә Өфөлә Сергей Образцов исемендәге дәүләт академия ҡурсаҡ театрын гастролдәргә көтәләр. Уның артистары Башҡорт дәүләт ҡурсаҡ театрында алтын фондтан бер нисә спекталь күрһәтә.

«Ҡыҙыҡ, ҡурсаҡ сәхнәһе оҫталары беҙҙең театрҙы нисек баһалар икән», — тип өҫтәне Башҡортостан Башлығы.

Радий Хәбиров билдәләүенсә, Башҡорт ҡурсаҡ театрында тормош — сәхнәлә генә түгел. Бында балалар студияһы ла эшләй. Режиссерҙар, актёрҙар һәм рәссамдар балалар менән бергә һүрәт төшөрә, ҡурсаҡтар яһай, декорациялар уйлап сығара һәм спектаклдәр сәхнәләштерә.

«Октябрь айында театрҙа мультимедиалы уйын залын асырға уйлайбыҙ. Компьютер технологиялары ярҙамында балалар һәм уларҙың ата-әсәләре башҡорт мәҙәниәте һәм ғөрөф-ғәҙәттәре, риүәйәттәре менән таныша алыр», — тип йомғаҡ яһаны республика етәксеһе.

https://www.bashinform.ru/news/nacproject/2024-09-19/radiy-habirov-anonsiroval-otkrytie-novogo-sezona-v-bashkirskom-teatre-kukol-3935713