Хәйбуллала күренекле ҡурайсы Йомабай Иҫәнбаевҡа һәйкәл асылды

Хәйбулла районының Аҡъяр ауылында оҫта ҡурайсы һәм башҡорт фольклорының күренекле вәкиле Йомабай Иҫәнбаевҡа һәйкәл асылды. Тантана 17 августа Түңгәүер ырыуы йыйыны барышында үтте, унда билдәле солистар һәм ҡурайсылар ансамблдәре ҡатнашты.

Йомабай Иҫәнбаев һәйкәленең авторы —  билдәлелек яулаған башҡорт скульпторы, Башҡортостандың атҡаҙанған рәссамы Хәниф Хәбибрахманов (Өфөләге Заһир Исмәғилев һәйкәле, «Ете ҡыҙ» фонтаны һәм башҡалар).

«Һәйкәл асылыуы — бик мөһим ваҡиға. Ул башҡорт халҡының мираҫына һәм традицияларына ихтирам билдәһе булып тора», — тип билдәләне Республика халыҡ ижады үҙәгенең генераль директоры Салауат Кирәев.

Шул уҡ көндө ҡурайсының тыуған төйәгендә уға бағышланған китаптың исем туйы уҙҙы. Данлыҡлы ҡурайсы хаҡында яҡташтары, китаптың авторҙаштары — Йомабай Иҫәнбаевтың биографияһын өйрәнгән Башҡортостандың халыҡ шағиры Ҡәҙим Аралбай һәм Рәсәйҙең атҡаҙанған артисы, Башҡортостандың халыҡ артисы, Түңгәүер ырыуы башлығы Хөрмәтулла Үтәшев үҙ һүҙен әйтте.

Хәтерегеҙгә төшөрәбеҙ, «Башинформ» Өфөлә Йомабай Иҫәнбаевтың тормошо һәм эшмәкәрлеге тураһында китап-альбом нәшер ителеүе хаҡында хәбәр иткәйне.

https://www.bashinform.ru/news/culture/2024-08-19/v-bashkirii-otkryli-pamyatnik-vydayuschemusya-kuraistu-yumabayu-isyanbaevu-3890439