Мостай Кәримдең әҫәре буйынса ҡуйылған спектакль Грозный ҡалаһында күрһәтеләсәк

Башҡорт әҙәбиәте классигы Мостай Кәримдең «Ярлыҡау» повесы буйынса ҡуйылған спектакль «Федерация» V Бөтә Рәсәй милли театрҙар фестивале программаһына индерелгән. Фестиваль 8 сентябрҙән 14 сентябргә тиклем Грозный ҡалаһында үтә. Салауат башҡорт дәүләт драма театры 14 сентябрҙә, фестивалде йомғаҡлау көнөндә, М.Ю.Лермонтов исемендәге рус дәүләт драма театры сәхнәһендә сығыш яһаясаҡ, тип хәбәр иттеләр Мәҙәниәт министрлығының матбуғат хеҙмәтенән. Театр «Федерация» Бөтә Рәсәй милли театрҙар фестивалендә икенсе тапҡыр ҡатнаша.

Спектаклдең премьераһы 2023 йылдың 18 октябрендә үтте, шулай уҡ тамаша 2024 йылдың мартында Өфөлә театр декадаһында күрһәтелде. Ҡуйыусы режиссер, инсценировка авторы — Ш. Бабич исемендәге республика дәүләт йәштәр премияһы лауреаты Илсур Ҡаҙаҡбаев, ҡуйыусы рәссам — Сулпан Азаматова, хореограф — Ольга Даукаева, композитор — Магуля Мезинова һәм яҡтыртыу буйынса рәссам — Илшат Сәйәхов.

Спектаклдә йәш артистар Артур Тажетдинов (Любомир Зух), Нәфисә Мәжитова (Мария Тереза), Башҡортостандың халыҡ артистары Яҡуп Шәрипов, Гөлсәсәк Шәрипова, Башҡортостандың атҡаҙанған артистары Мираҫ Йомағужин, Рәмзиә һәм Рафаэль Ғәйнуллиндар, Юнир Мансуров, Айнур Синағолов, Әмир Үтәбаев, Йәнгүзәл Халиҡова һәм Гөлкәй Хәсәнова ҡатнаша.

Спектакль «Берҙәм Рәсәй» партияһының «Кесе Ватан мәҙәниәте» проекты сиктәрендә ҡуйыла. «Ярлыҡау» — «Туғанлыҡ - 2024» VIII халыҡ-ара милли театрҙар фестивалендә ҡатнашыусы тамаша, ул «Милли классиканы заманса сәхнәләштереү» номинацияһында еңеү яуланы, шулай уҡ фестивалдең махсус призына лайыҡ булды. «Буренкин образындағы тәрән психологизм өсөн» номинацияһында Башҡортостандың халыҡ артисы Яҡуп Шәрипов бүләкләнде. Спектакль 2024 йылдың июнендә Рәсәйҙең бәләкәй ҡалалары театрҙары фестивале программаһына инде.

«Федерация» фестивале барышында Хакасия, Саха-Яҡут, Адыгея, Мари Эл, Дағстан, Башҡортостан, Татарстан, Чечен республикалары, Ырымбур өлкәһе һәм Көньяҡ Осетия театрҙарының 13 спектакле күрһәтеләсәк. Фестивалдең мәҙәни-белем биреү программаһына оҫталыҡ дәрестәре, милли театрҙар режиссерҙары өсөн лаборатория, түңәрәк өҫтәлдәр, ижади осрашыуҙар, режиссер фекер алышыу-батлы, йәмәғәт һөйләшеүҙәре, профессор Ирина Автушенко етәкселегендәге консультация үҙәге, шулай уҡ Мәскәүҙең «Ромен» театры режиссеры Наталья Романцова етәкселегендәге милли театрҙар режиссерҙары өсөн семинар булараҡ уҙғарыла. Фестиваль сиктәрендә Рәсәй Федерацияһының халыҡ артисы, театр һәм кино актеры, фестивалдең художество советы рәйесе Александр Галибин ижади осрашыу үткәрә.

Автор: Ләйлә Аралбаева

https://www.bashinform.ru/news/culture/2024-08-14/spektakl-po-povesti-mustaya-karima-pokazhut-na-festivale-federatsiya-v-groznom-3884529