2024 йылда Башҡортостанда иң яҡшы музыкаль әҫәрҙәрҙе асыҡлау буйынса республика конкурсы бара. Мәҙәниәт министрлығының конкурсты үткәреү тураһында бойороғо рәсми хоҡуҡи мәғлүмәт порталында баҫылған.
Конкурсты ойоштороуҙа Башҡортостан Республикаһының Дәүләт академия симфоник оркестры һәм Композиторҙар союзы төбәк йәмәғәт ойошмаһы ҡатнаша.Композиторҙарҙың йәше һәм гражданлығы мөһим түгел, урта йәки юғары профессиональ музыкаль белем талап ителә.
Конкурстың маҡсаты — Башҡортостандың театр-концерт ойошмалары репертуарына индереү өсөн әҫәрҙәрҙе тәҡдим итеү, Башҡортостан Республикаһының Дәүләт академия симфоник оркестры йыйылмаһында заманса музыка сәнғәте коллекцияһын тулыландырыу. Шулай уҡ һәләтле авторҙарҙы, башҡарыусыларҙы һәм композиторҙарҙы асыҡлау, уларға ярҙам итеү.
Конкурсты үткәреү ваҡыты — 2024 йылдың 26 авгусынан 16 сентябренә тиклем.