Өфөлә башҡорт халыҡ эпосы «Заятүләк менән Һыуһылыу» буйынса спектакль күрһәтелә

28 июндә Мәжит Ғафури исемендәге Башҡорт дәүләт академия драма театрында Мәжит Ғафуриҙың «Заятүләк менән Һыуһылыу» повесы буйынса спектаклдең премьераһы була.

Пьесаның авторы – Мария Малухина, ҡуйыусы режиссёр – Илсур Ҡаҙаҡбаев, ҡуйыусы рәссам – Анна Бубнова, композитор – Магуля Мезинова, хореограф – Илья Козичев, рәссам-яҡтыртыусы – Сергей Скорнецкий, визуаль эффекттар буйынса рәссам – Михаил Теребиленко, башҡорт теленә тәржемәсе – Динара Ҡәйүмова.

Театрҙың матбуғат хеҙмәтендә белдереүҙәренсә, «Заятүләк менән Һыуһылыу» спектаклендә легендар батыр Заятүләк менән Асылыкүл батшаһының ҡыҙы Һыуһылыуҙың мөхәббәте хаҡында бәйән ителә. Боронғо эпостарҙағы кеүек, хәл-ваҡиғалар ерҙә генә түгел, һыу аҫты донъяһында ла бара. Ике батшалыҡ араһында оҙаҡ йылдар дауам иткән дошманлыҡ яңы кимәлгә сыға – яҡындарының үлеме өсөн үс алырға теләп, яҡтарҙың һәр ҡайһыһы һуғышҡа әҙерләнә. Быға Заятүләк менән Һыуһылыу араһында тоҡанған һөйөү хистәре генә ҡаршы торорға мөмкин.

Сағыу костюмдар, йыр-бейеү тамашасыларға башҡорт эпосының серле донъяһына сумырға мөмкинлек бирә.

Спектакль рус теленә синхрон тәржемә ителә.

https://www.bashinform.ru/news/culture/2024-06-23/v-ufe-pokazhut-spektakl-po-bashkirskomu-narodnomu-eposu-zayatulyak-i-hyuhylyu-3819570