Өфөгә VIII «Туғанлыҡ» халыҡ-ара фестиваленә актер Владимир Машков килә

Өфөлә VIII «Туғанлыҡ» халыҡ-ара фестивале ойошторола. Быйыл театр байрамының форматын киңәйтергә ҡарар ителде. Бығаса фестиваль «Төрки телле театрҙар фестивале» тип атала ине, хәҙер уның форматы киңәйҙе.

Фестивалдә 14 спектакль ҡатнаша. Конкурс программаһында — Татарстан, Ҡаҙағстан, Ҡырғыҙстан, Төньяҡ Осетия-Алания, Сыуашстан, Ҡалмыҡстан, Абхазия, Тыва, Дағстан, Марий Эл театр коллективтарының спектаклдәре. «Башинформ» хәбәр иткәнсә, Башҡорт академия драма театрының «Ҡыҙыл паша» һәм А.С. Пушкин исемендәге Псков драма театрының М. Булгаков әҫәре буйынса «Морфий» спектаклдәре конкурстан тыш күрһәтелә.

«Туғанлыҡ» милли театрҙар фестиваленә почетлы ҡунаҡ итеп Рәсәй Федерацияһының Театр эшмәкәрҙәре союзы рәйесе, Мәскәүҙең Олег Табаков театрының художество етәксеһе, Рәсәйҙең халыҡ артисы Владимир Машков саҡырылған.

Фестиваль Өфөлә 2024 йылдың 16-23 майында уҙғарыла. Уны Башҡортостан хөкүмәте һәм республиканың Мәҙәниәт министрлығы ойоштора. Спектаклдәрҙе Мәжит Ғафури исемендәге Башҡорт драма театры, Өфө «Нур» татар театры, Мостай Кәрим исемендәге Милли йәштәр театры сәхнәләрендә ҡарарға мөмкин.

6+

https://www.bashinform.ru/news/culture/2024-04-17/v-ufu-na-viii-mezhdunarodnyy-festival-tuganlyk-priedet-aktyor-vladimir-mashkov-3731792