Өфөлә Сергей Аксаковтың йорт-музейы яңыртыла

Бөгөн, 6 февралдә, Өфөлә Башҡортостан Башлығы Радий Хәбиров Рус география йәмғиәте төбәк бүлексәһенең попечителдәр советы ултырышы алдынан күренекле яҡташыбыҙ, рус яҙыусыһы Сергей Тимофеевич Аксаковтың мемориаль йорт-музейы экспозицияларын ҡараны.

Йорт-музей XVIII быуат уртаһынан һаҡланып ҡалған һәм ҡаланың тәүге административ биналарының береһе булып торған боронғо өйҙә урынлашҡан. 1770-1790 йылдарҙа унда Товарищ наместник канцелярияһы булған (был вазифаны яҙыусының әсәһе яғынан олатаһы Николай Семенович Зубов башҡарған).

Аксаков мемориаль йорт-музейының өлкән ғилми хеҙмәткәре Татьяна Петрова экскурсия ваҡытында музейҙың тарих һәм архитектура ҡомартҡыһы булыуын әйтте. Музей 1991 йылда танылған яҙыусының 200 йыллығы айҡанлы асылған. Ул мемориаль һәм әҙәби бүлектәргә бүленгән.

Мемориаль өлөш ете бүлмәнән тора. Уларҙың һәр береһендә Аксаковтар ғаиләһенең көнкүреш әйберҙәре ҡәҙерләп һаҡлана.

Әҙәби яҡта өс кенә бүлмә. Бындағы экспонаттар яҙыусы тормошонан аҙаҡҡыраҡ осорҙо сағылдыра. Залдарҙа ҡулъяҙмалар, китаптар, ғаиләнең шәжәрә ағасы, һирәк осраған фотоһүрәттәр һәм картиналар урын алған. Николай Богатовтың бала саҡтан барыбыҙға ла билдәле «Ал сәскә» әкиәтенә төшөргән иллюстрацияларын күрергә мөмкин. Залда ҡуйылған әйберҙәр Сергей Тимофеевич Аксаковтың улы эше менән бәйле. Ул үҙ ваҡытында Өфө губернияһы губернаторы булған.

Музей хеҙмәткәрҙәре әйтеүенсә, музейға утыҙ йылдан ашыу капиталь ремонт яһалмаған. Радий Хәбиров Мәҙәниәт министрлығына бинаны төҙөкләндереү буйынса тәҡдимдәр индерергә ҡушты.

«Был мәсьәләне төптән уйлап хәл итергә кәрәк. Атмосфераны һаҡлап ҡалыу мөһим. Музейҙарҙың һәм боронғо әйберҙәрҙең күркәмлеге нимәлә? Бында элек кешеләрҙең нисек йәшәгәнен күрергә мөмкин. Реставрация эштәре барышында инженерлыҡ инфраструктураһына иғтибар итербеҙ, музейҙы ниндәй өҫтәмә экспонаттар менән тулыландырырға мөмкин икәнлеген ҡарарбыҙ. Беҙ Аксаковтың ижадын, ғаиләһенең мираҫын популярлаштырыуҙы дауам итәбеҙ. Былтыр Аксаков исемендәге баҡсаны төҙөкләндерҙек. Музейға капиталь ремонт ошо эштең дауамы булыр», -  тине Радий Хәбиров.

https://www.bashinform.ru/news/culture/2024-02-06/v-ufe-otrestavriruyut-dom-muzey-sergeya-timofeevicha-aksakova-3632191