Опера театры йырсыһы —  «Башҡорт йыры-2023» телевизион конкурсы еңеүсеһе

Өфөлә «Башҡорт йыры-2023» телевизион фестиваль-конкурсы еңеүселәре иғлан ителде. Быйыл гран-приҙы Башҡорт дәүләт опера һәм балет театры солисы, халыҡ-ара, Рәсәй, төбәк-ара һәм республика конкурстары лауреаты Айтуған Вәлмөхәмәтов яуланы.

Йәш йырсы Өфө сәнғәт институтын тамамлаған, музыкаль ғаиләлә үҫкән. Атаһы Радик Вәлмөхәмәтов — билдәле эстрада йырсыһы, Башҡорт дәүләт филармонияһы солисы. Еңеүсе диплом, 100 мең һумлыҡ сертификат, шулай уҡ башҡорт йырының мәңгелеген символлаштырған статуэтка менән бүләкләнде, тип хәбәр иттеләр Мәҙәниәт министрлығынан.

«Йыл асышы» номинацияһында — Алтынай Сәлихова, «Үҙенсәлекле башҡарыу өсөн» номинацияһында — Зөфәр Атанғолов, «Сағыу башҡарыу өсөн» номинацияһында — Айнур Әмиров, «Өмөт» номинацияһында  —Гөлсиә Мараканова, «Йолаларҙы тергеҙеү» номинацияһында — Айнур Собханғолов, «Халыҡсан башҡарыуы» номинацияһында — Нәркәс Мөхәмәтйәнова, «Халыҡ йырын иң яҡшы башҡарыу» номинацияһында — Фәһим Тоҡомбәтов, «Композитор йырын үҙенсәлекле башҡарыу» номинацияһында — Элина Хәкимова, «Артистарса оҫта башҡарыу өсөн» номинацияһында — Йәнгүзәл Халиҡова бүләкләнһә,Айгиз Уйылданов, Ләйсән Нуриева, Рәхилә Тайыпова, Фәриҙә Ғаззалова, Ләйсән Мәүлетҡолова, Айнур Туҡтаев, Әлфиә Ниғмәтуллина конкурс лауреаттары булды. Йырсыларҙы  Башҡортостандың халыҡ артистары Рөстәм Ғиззәтуллин һәм Азамат Тимеров, Башҡортостандың атҡаҙанған артисы Лилиә Биктимерова баһаланы.

https://www.bashinform.ru/news/culture/2023-12-18/gran-pri-telekonkursa-bashkort-yyry-2023-dostalos-molodomu-solistu-opery-3570742