Өфөлә «Иҙел» башҡорт һәм татар йыры конкурсына ғаризалар ҡабул ителә

Тиҙҙән Башҡортостандың баш ҡалаһында сираттағы милли йыр байрамы — 13-сө тапҡыр «Иҙел» халыҡ-ара башҡорт һәм татар йыры фестиваль-конкурсы үткәрелә.

Ойоштороусылар хәбәр итеүенсә, фестивалгә башҡорт һәм татар телдәрендә йырҙар башҡарыусы ижади юғары уҡыу йорттарын тамамлаусылар һәм студенттар саҡырыла. Халыҡ, эстрада, академик һәм автор йыры номинацияларында ҡатнашырға мөмкин. Балалар номинацияһында 6 йәше тулған йәш башҡарыусыларҙы көтәләр.

Конкурстың шарттары менән танышыу өсөн ошо һылтанма буйынса үтергә һәм ғариза тултырырға мөмкин.

Быйыл жюриҙа Рәсәйҙең һәм Башҡортостандың халыҡ артисы, Өфө дәүләт сәнғәт институты профессоры Флүрә Килдейәрова, Рәсәйҙең һәм Татарстандың халыҡ артисы, Ҡазан дәүләт филармонияһы профессоры Зилә Сөнғәтуллина, Татарстандың халыҡ артисы, композитор Зөфәр Хәйретдинов, Рәсәйҙең һәм Башҡортостандың атҡаҙанған сәнғәт эшмәкәре, Өфө дәүләт сәнғәт институты профессоры Фәрзәнә Сәғитова, Башҡортостандың халыҡ артисы Вилдан Яруллин, Башҡортостандың атҡаҙанған сәнғәт эшмәкәре, композитор Урал Иҙелбаев, шулай уҡ үткән йылдарҙағы «Иҙел» лауреаттары: Башҡортостандың атҡаҙанған артисы Зилиә Бәхтиева һәм Башҡорт дәүләт филармонияһы солисы Рәфис Сирусин эшләй.

https://www.bashinform.ru/news/culture/2023-10-06/v-ufe-konkurs-bashkirskoy-i-tatarskoy-pesni-idel-prinimaet-zayavki-3468175