Санкт-Петербургта Башҡортостан Республикаһы көндәре үтәсәк

25 августан 27 авгусҡа тиклем Санкт-Петербург ҡалаһында Башҡортостан Республикаһы көндәре үтәсәк, тип хәбәр итте БР хөкүмәтенең оператив кәңәшмәһендә төбәк Башлығы Радий Хәбиров. Күләмле сара барышында Башҡортостандың иҡтисади, инвестиция һәм туристик мөмкинлектәре менән таныштырасаҡтар, башҡорт еңел сәнәғәте модаһын, тауарҙар йәрминкәһен һәм «Ҡаҙ һәм бал» гастрофестивален күрһәтәсәктәр. Шулай уҡ Рәсәйҙең һәм Ленинград өлкәһенең эшҡыуарҙары менән бизнес-осрашыуҙар көтөлә.

Бынан тыш, республика көндәрендә БР Милли халыҡ ҡоралдары оркестры, Башҡорт дәүләт филармонияһы артистары, БР Милли симфоник оркестры һәм «Йатаған», «Хазина» һәм «Зәйнетдин» этно-проекттары ҡатнашлығында «Башҡортостан дуҫтарын йыя» концерты үтәсәк.  Билдәле йырсылар Асҡар һәм Илдар Абдразаҡовтарҙың, Николай Басковтарҙың сығыш яһауы көтөлә.

Байрам барышында БР-ҙың туристик-мәғлүмәт үҙәге эшләйәсәк. Сарала ҡатнашыусыларға һәм ҡунаҡтарға республика режиссерҙары фильмдары — «Алдар и серы волк», «Ни пуха ни пера», «Охотник Юлдыбай», «Из Уфы с любовью» һәм «Отряд Таганок» кеүек кинокартиналар күрһәтеләсәк.

«Был бик ҙур сара, бында иҡтисад-ара һәм гуманитар мөнәсәбәттәргә бәйле мөһим һорауҙар ҡараласаҡ, Эрмитаж, Арктика һәм башҡа музейҙар менән бәйләнеш булдырыласаҡ, парктарҙы төҙөкләндереү буйынса ҡыҙыҡлы тәҡдимдәр буласаҡ. Был мөһим ваҡиға», — тип билдәләне Радий Хәбиров.

Бынан алда «Башинформ»  Мәскәү өлкәһенең Архангельское музей-ҡурсаулығы биләмәһендә республика көндәре үтәсәге хаҡында хәбәр иткәйне.