Ырымбур өлкәһендә «Һабантуй» байрамы үтте

Ырымбур өлкәһенең Ҡыуандыҡ районы Ибраһим ауылында «Һабантуй-2023» башҡорт мәҙәниәтенең өлкә байрамы үтте. Был сараны Башҡортостан Республикаһы һәм Ырымбур өлкәһе хөкүмәте ойошторҙо.

Республика делегацияһын Башҡортостан Дәүләт Йыйылышы депутаты, Рәсәй халыҡтары ассамблеяһының Башҡортостан төбәк бүлексәһе һәм Башҡорт ҡатын-ҡыҙҙары йәмғиәте рәйесе, «Ватанды һаҡлаусылар» дәүләт фонды филиалы етәксеһе, филология фәндәре докторы Гөлнур Ҡолһарина етәкләне.

Һабантуйҙы асыу тантанаһында Гөлнур Ҡолһарина ҡатнашыусыларҙы Башҡортостан Башлығы Радий Хәбиров исеменән сәләмләне, илебеҙ өсөн ошондай ҡатмарлы осорҙа барыһына ла берҙәмлек теләне. Һуңынан ҡунаҡтарҙы Башҡортостан Башлығының дәүләт наградалары менән бүләкләне.

Ейәнсура районы вәкилдәре һабантуйҙа башҡорт милли ихатаһы, халыҡ кәсептәре күргәҙмәһе, спорт ярыштары һәм милли уйындар ойошторҙо.

Милли көрәш һәм ат сабыштары һәр ваҡыттағыса һабантуйҙың төп йәме булды. Бынан тыш, ҡунаҡтар төрлө оҫталыҡ дәрестәрендә ҡатнашты, башҡорт милли ризыҡтарынан ауыҙ итте.

Нефтекама дәүләт филармонияһы байрам ҡунаҡтарына сағыу концерт программаһы әҙерләгәйне.

https://www.bashinform.ru/news/culture/2023-06-25/v-orenburgskoy-oblasti-sostoyalsya-prazdnik-bashkirskoy-kultury-sabantuy-3313647