Сочиҙа милли байрам — һабантуй уҙҙы

Сочи ҡалаһында, Адлер районының мәҙәниәт һәм ял паркында, милли байрам — һабантуй ойошторолдо. Башҡортостан Республикаһының Мәҙәниәт министрлығы, Х. Әхмәтов исемендәге Башҡорт дәүләт филармонияһы булышлығы менән Сочиҙа йәшәгән ватандаштарыбыҙ һәм ҡала ҡунаҡтары башҡорт эстрадаһы артистарының сығыштарын тамаша ҡылды. 

Мәҙәниәт министрлығының матбуғат хеҙмәтенән хәбәр итеүҙәренсә, йырсы Әлфиә Ниғмәтуллина, ҡурайсы, Башҡортостандың халыҡ артисы Азат Биксурин, йәш йырсы Илдар Абдуллин, Башҡортостандың атҡаҙанған артисы Искәндәр Ғәзизов сығыш яһаны, Евгения Цыпина халыҡ бейеүҙәрен башҡарҙы. Артистар рәхмәт хаттары менән бүләкләнде.

Сочи ҡалаһы башҡорттары автономияһы милли ризығыбыҙ — сәк-сәк бешереү буйынса оҫталыҡ дәресе үткәрҙе. 25 бала үҙҙәре ҡамыр йәйеп, таҫмалар итеп киҫеп, ҡайнаған майҙа бешереп, һауыттарға өйөп һалып, тәмлекәсте Рәсәй флагы төҫтәре менән биҙәне.

Һабантуй төрлө милләт вәкилдәренә күңелле ял итергә һәм уйындарҙа, ярыштарҙа ҡатнашырға мөмкинлек бирҙе.

https://www.bashinform.ru/news/culture/2023-06-16/v-sochi-proshyol-natsionalnyy-prazdnik-sabantuy-3301643